काठमाडौं- भारतका चिफ अफ डिफेन्स स्टाफ जनरल अनिल चौहनले फ्रान्सेली समकक्षी फेबियन मान्डोनसँग छलफल गरेका छन् । यस छलफल द्विपक्षीय रक्षा सहकार्य अभिवृद्धि गर्ने विषयमा केन्द्रित रहेको भारतीय सञ्चार माध्यमले जनाएका छन् ।

भर्चुअल माध्यमबाट भएको वार्ता दीर्घकालीन साझेदारी विकास गर्ने र होराइजन २०४७ भिजनको कार्यान्वयन गर्ने विषयमा केन्द्रित थियो । त्यसबाहेक संयुक्त सैन्य अभ्यास, रक्षा उद्योगमा सहकार्य र अन्तरिक्ष क्षमतामा साझेदारी विकास गर्ने विषयमा पनि दुई सैन्य अधिकारीले छलफल गरेका छन् ।

भारतीय समाचार संस्था एएनआईका अनुसार दुई सैन्य अधिकारीले हिन्द प्रशान्त सुरक्षाका लागि प्रतिआतङ्कवाद र रक्षा साझेदारी वृद्धि गर्न पनि सहमति जनाएका छन् । पछिल्लो समय भारत र फ्रान्सबीच रक्षा साझेदारी विकास हुँदै गइरहेको छ ।

भारतले फ्रान्ससँग मिलेर फ्रान्समै गरुडा २५ नामक संयुक्त हवाई अभ्यास सञ्चालन गरिरहेको छ । आगामी नोभेम्बर २७ सम्म सञ्चालन हुने अभ्यासमा सुखोइ सु ३०, सी १७ ग्लोबमास्टर तृतीय र इल्युशिन आईएल ७८ जस्ता विमान परिचालन गरिएको छ ।