काठमाडौं- नेकपा एमालेका वरिष्ठ उपाध्यक्ष ईश्वर पोखरेलले बिहीबारको सचिवालय बैठकमा आसन्न ११औँ महाधिवेशनमा आफू अध्यक्ष पदको उम्मेदवार रहेको जानकारी गराए।

पोखरेलले आफू सबै हिसाबले योग्य र सक्षम रहेकाले जसरी पनि अध्यक्षमा लड्ने योजना बैठकमा सुनाए। लगत्तै ओलीले उनलाई प्रतिक्रिया दिए– मभन्दा योग्य पात्र अहिले कोही छैन।

ओलीले अहिलेको संकट मोचनका लागि आफू नै योग्य रहेको दोहोर्याए। एमालेले अहिले आफ्नो विकल्प नखोजेको भन्दै उनले अध्यक्षमा लड्ने निर्णय परिवर्तन गर्न पनि आग्रह गरे। त्यसपछि ईश्वरले कुनै पनि हालतमा पछि नहट्ने जवाफ फर्काए।
ईश्वरको जवाफ सुनेपछि ओलीले भने, ‘कुनै पनि हालतमा म अहिले अध्यक्ष छोड्नेवाला छैन। अहिले पार्टी बचाएर जानुपर्ने छ । कार्यकर्ताको निराशालाई चिर्नुपर्नेछ।’

ओलीलाई उदृत गर्दै खबरसँग कुरा गरेका सचिवालय सदस्यले थपे, ‘नलड्नुस् पनि भन्दिनँ तर सकभर सोच्नुहोस्। म अहिले अध्यक्षबाट हट्दिनँ नै।’ एमाले नेताहरूका अनुसार आगामी महाधिवेशनमा ओली र पोखरेलबीच प्रतिस्पर्धा हुने निश्चित भइसकेको छ।

यता पोखरेलसहितले सार्वजनिक रुपमै यही मंसिर ८ गते आफ्नो उम्मेदवारी घोषणा गर्दैछन्।