काठमाडौं– बाराको सिमरामा हिजोदेखि बढ्दै गएको तनाव र हिंसात्मक घटनाप्रति नेपाली कम्युनिस्ट पार्टीका संयोजक पुष्पकमल दाहाल प्रचण्डले गम्भीर चासो देखाएका छन्। 

सामाजिक सञ्जालमार्फत बिहीबार प्रतिक्रिया दिँदै उनले स्थितिलाई नियन्त्रणबाहिर जान नदिन सबैलाई संयमता अपनाउन आग्रह गरेका छन्।

लोकतन्त्रमा विचार भिन्नता स्वाभाविक भए पनि राजनीतिक मतभेदलाई हिंसा वा उत्तेजनामा बदल्नु अस्वीकार्य हुने उनले बताएका छन् । 

उनले राजनीतिक स्वतन्त्रताको सम्मान हुने वातावरण बनाउन सरकारलाई ध्यानाकर्षण समेत गराएका छन्। राजनीतिक दलका कार्यकर्ता र नेताहरूलाई हिँडडुल गर्ने, सभा र कार्यक्रम गर्न पाउने सुनिश्चितता जरुरी रहेको प्रचण्डले बताएका छन् ।  

आगामी फागुन २१ गतेको निर्वाचनलाई शान्तिपूर्ण र निष्पक्ष बनाउन कुनै पनि घटना बाधक नबनोस् भन्नेमा सबै पक्ष जिम्मेवार बन्न उनले अपिल गरे। 

उनले स्थानीय पार्टी समितिहरूलाई तनाव न्यूनीकरणका लागि आवश्यक सहजीकरण गर्न निर्देशन दिएको बताएका छन्।