काठमाडौं– नेपाली कांग्रेसका प्रवक्ता डा. प्रकाशशरण महतले दलहरूलाई जनतामा जान रोकेर निर्वाचन नहुने बताएका छन् ।

डा. महतले आगामी फागुन २१ गतेको निर्वाचन तयारीबारे प्रधानमन्त्री सुशीला कार्कीले बुधबार बोलाएको सर्वदलीय बैठकमा उनले बाराको सिमरामा भएको घटनाप्रति लक्षित गर्दै गम्भीर प्रश्न उठाएका हुन् ।

बाराको सिमरामा बुधबार जेनजीका नाममा भएको घटनालाई उनले राजनीतिक पूर्वाग्रहको सङ्केतको रूपमा लिएका छन् ।उनले सरकार निर्वाचनका लागि आधारभूत पूर्वाधारमा केन्द्रित नभएको आरोप लगाए । 

यस्तो वातावरणले निर्वाचन सफल हुन कठिन बनाउने उनको भनाइ छ । उनले थपे, ‘दलको भूमिका जनतामा पुग्ने हो। त्यही काममा अवरोध आयो भने समस्या देखिन्छ । अहिलेको अवस्थाले निर्वाचनअनुकूल माहोल बनेको देखाएको छैन।’

उनले संविधानले जे व्यवस्था गरे पनि निर्वाचनमार्फत संसद् पुनःस्थापना गर्ने विकल्प कांग्रेसले स्वीकार गरिसकेको स्पष्ट पारे । ‘हामी निर्वाचनमा जान तयार छौँ, तर सरकारको तयारी शान्ति सुरक्षाको ग्यारेन्टी दिन सक्ने खालको छैन । यसअघि भएको छलफल र अहिलेको छलफलबीच खासै फरक पनि देखिएन’, उनले बैठकमा राखेको भनाइबारे भने ।