काठमाडौं– निजी स्वास्थ्य संस्थाका प्रतिनिधिहरूले नर्सहरूको तलब स्केल सम्बन्धी आन्दोलनका विषयमा भइरहेको औपचारिक वार्ताका क्रममा आफुहरुमाथी अपमानजनक व्यवहार भएको बताएका छन् । 

एशोसिएन अफ मेडिकल एन्ड डेन्टल कलेज नेपाल  र एसोसिएसन अफ प्राइभेट हस्पिटल्स इन नेपाल (अफिन) ले संयुक्त विज्ञप्ति जारी गर्दै स्वास्थ्य मन्त्रालयको आयोजनामा कार्यदलस्तरको वार्ताका क्रममा आन्दोलनरत पक्षबाट माफि लेखिएका प्लेकार्ड देखाउने, अपमानजनक शब्द प्रयोग गर्ने र अनुचित व्यवहार प्रकट गरिएको घटना अस्वीकार्य भएको बताएका छन् ।

हामी सधैं संवाद, सहकार्य र आपसी सम्मानका आधारमा समस्या समाधानमा विश्वास गर्छौं । नर्सहरूको योगदानको उच्च सम्मान गर्दै उनीहरूको जायज मागप्रति पनि हामी सकारात्मक छौं, तर यस्तो व्यवहारले वार्ताको वातावरण बिगारेको छ जारी विज्ञप्तिमा भनिएको छ । 

संयुक्त विज्ञप्तिअनुसार, यस्तो व्यवहारका कारण निजी स्वास्थ्य संस्थाका प्रतिनिधिहरू वार्ताको कक्षबाट बाहिरिन बाध्य भएका थिए ।

संस्थाहरूले घटनाको जिम्मेवारी राज्य पक्षकै कमजोरी र असन्तुलित व्यवस्थापनका कारण उत्पन्न भएको दाबी गर्दै भनेका छन् ‘सरकारले समयमै दिगो नीति, समान व्यवहार र स्पष्ट कार्यविधि नल्याएकै कारण यस्तो अवस्था सिर्जना भएको हो । त्यसैले सम्पूर्ण जिम्मेवारी सरकारले लिनुपर्छ’।

संस्थाहरूले देशभरका निजी अस्पतालहरू निरन्तर स्वास्थ्य सेवा प्रदान गरिरहेकाले आगामी दिनमा पनि सरकार र स्वास्थ्यकर्मीहरूसँग सहकार्यका माध्यमबाट न्यायोचित समाधान खोज्ने प्रतिबद्धता जनाएका छन् ।

तर, उनीहरूले भविष्यमा यस्ता अपमानजनक व्यवहार दोहोरिएमा आफ्नो स्वाभिमान र सदस्य संस्थाहरूको प्रतिष्ठा जोगाउन आवश्यक कदम चाल्न बाध्य हुने चेतावनी दिएका छन् । संयुक्त विज्ञप्तिमा मेडिकल कलेजहरूका तर्फबाट अध्यक्ष डा. ज्ञानेन्द्रमान सिंह कार्की  र अफिनका तर्फबाट उपाध्यक्ष हरिप्रसाद रिजालले हस्ताक्षर छन् ।