काठमाडौं- नेकपा (माओवादी केन्द्र)का अध्यक्ष पुष्पकमल दाहाल प्रचण्डले सहकारी ठगी प्रकरणमा हाल ललितपुरको नख्खु कारागारमा रहेका राष्ट्रिय स्वतन्त्र पार्टीका सभापति रवि लामिछानेलाई भेटेका छन् ।

बुधबार साँझ नख्खु कारागारमा पुगेर प्रचण्डले पूर्वगृहमन्त्रीसमेत रहेका लामिछानेसँग कारागारको बसाइ र उनको स्वास्थ्य अवस्थाबारे जानकारी लिएका हुन्।

रविले त्यसक्रममा आफूलाई भैरहवा कारागारमा गोलघर भित्रजस्तै राखिएको बताएका थिए । अहिले नख्खुमा आफूलाई धेरै सहज भएको जवाफ रविले दिएको प्रचण्डले बताएका छन्। भैरहवाको बसाइले रविको अवस्था जटिल भएर उनी दुब्लाएको आफूले महसुस गरेको प्रचण्डले सुनाए ।

‘भैरहवामा उहाँको स्वास्थ्य बिग्रिएको रहेछ। तर यहाँ आएपछि सुधार हुँदैछ भन्नुभयो’, प्रचण्डले भने, ‘उहाँ अहिले दुब्लाउनु भएको छ। अनुहार भने राम्रै देखिन्छ।’

लामिछानेलाई गत साउन ३१ गते भैरहवा कारागारबाट अड्डासार गरेर नख्खु कारागार ल्याइएको थियो। बुटवलस्थित सुप्रिम सहकारी संस्थाको बचत रकम ठगी प्रकरणमा उनी २०८१ चैत २५ गतेदेखि भैरहवा कारागारमा थिए ।

लामिछानेले अड्डासारको निवेदन दिएपछि उनलाई ललितपुरमा सारिएको हो । सुप्रिम सहकारीको बचत अपचलन प्रकरणमा उनलाई चैत २५ गते भैरहवा कारागार चलान गरिएको थियो ।

लामिछानेले गत जेठ १४ गते नै रुपन्देही जिल्ला अदालतमा कारागार सरुवाका लागि निवेदन दिएका थिए। अदालतले पनि जेठ १६ गते अड्डासारको अनुमति दिएको थियो । तर सरकारले सुरक्षा व्यवस्थापनमा समस्या देखाएर समय लगाएको थियो ।