धनगढी– सुदूरपश्चिम प्रदेशका मुख्यमन्त्री कमलबहादुर शाहले अपराध नियन्त्रणमा कसैले पनि अवरोध गर्न नहुने बताएका छन् । जिल्ला समन्वय समितिले बुधबार धनगढीमा आयोजना गरेको ‘आर्थिक वर्ष २०८१-०८२ को वार्षिक प्रगति समीक्षा एवं स्थानीय तहको असल अभ्यास’सम्बन्धी अनुभव आदन-प्रदान कार्यक्रमको उद्घाटन गर्दै उनले यस्तो बताएका हुन् । 

कैलालीका प्रमुख जिल्ला अधिकारी र सुरक्षा निकायका प्रमुख उपस्थित कार्यक्रममा मुख्यमन्त्री शाहले अपराध नियन्त्रण गर्ने क्रममा कसैको अनुहार नहेर्नसमेत आग्रह गरे ।

 ‘कुनै किसिमको अपराध सैह्य हुने छैन । कुनै किसिमको गुण्डागर्दी सैह्य हुनेछैन,’ शाहले भने, ‘अपराध र लागू औषध नियन्त्रणमा हामी सबै जनप्रतिनिधिहरूले सहयोग गर्नुपर्छ । हामीले त्यो वातावरण निर्माण गरेका छौँ, अझैँ प्रभावकारी बनाउन जरुरी छ ।’

एक अर्को प्रशंगमा मुख्यमन्त्री शाहले पालिकामा वित्तिय हस्तान्तरण तर्फको बजेट आफू आएपछि क्रमशः बढाउदै लगेको बताए । उनले पहिलो पटक आफू मुख्यमन्त्री हुँदा दुई प्रतिशत रहेको वित्तिय हस्तान्तरण बढाएर पहिलो वर्षमा आठ प्रतिशत र दोस्रो कार्यकालमा १२ प्रतिशत पुर्‍याएको बताए ।