काठमाडौं– इजरायली प्रधानमन्त्री बेन्जामिन नेतान्याहू बिरामी परेका छन् । शनिबार अबेर स्वास्थ्य जाँच गर्दा उनलाई आन्द्रा पोल्ने समस्या देखा परेको चिकित्सकले जनाएका छन् ।

हदसा आइन केरेम अस्पतालको आन्तरिक स्वास्थ्य विभागका प्रमुख प्राध्यापक अलोन हेरेस्कोका अनुसार विषाक्त खाना खाएपछि उनी बिरामी परेका हुन् । पछि उनमा जलवियोजनको समस्या पनि देखा परेको इजरायल नेशनल न्यूजले जनाएको छ ।

प्रधानमन्त्री कार्यालयले उनको स्वास्थ्य अवस्था अहिले सामान्य रहेको जानकारी दिएको छ । चिकित्सकको सल्लाहअनुसार उनले स्लाइन पानी लिइरहेको जनाइएको छ ।

हाल उनी घरमै आराम गरिरहेका छन् । उनले तीन दिनसम्म घरबाटै सरकारी मामिला हेर्ने समाचारमा उल्लेख छ ।

इजरायलका राष्ट्रिय सुरक्षामन्त्री इतमार बेन ग्भिरले प्रधानमन्त्रीलाई शीघ्र स्वास्थ्य लाभको कामना गरेका छन् ।