काठमाडौं– भारतको तेजस नेटवर्कसँग मिलेर दक्षिण कोरियाको खुशटेक कोरिया नामक विद्युतीय उपकरण निर्माता कम्पनीले इन्टरनेटबिना मोबाइलमै टेलिभिजन हेर्न मिल्ने फोन ल्याएको छ । खुशटेकले ‘डाइरेक्ट टू मोबाइल’ (डीटूएम) प्रविधिमा आधारित फोनको विकास गरेको हो ।

यस फोनमार्फत् इन्टरनेट वा वाइफाइ कनेक्सनबिनै टेलिभिजन च्यानल, ओटीटी भिडियो, अडियोका साथै टेक्स्टमा आधारित सूचना प्राप्त गर्न सकिनेछ । यस फोन टेलिभिजन च्यानलका लागि प्रयोग हुने तरङ्गमा आधारित हुने जनाइएको छ ।

भारतीय समाचार संस्था एएनआईका अनुसार यस फोनमा साङ्ख्य ल्याबको एसएल–३००० डीटूएम डिमोजुलर चिप प्रयोग गरिएको छ । यसले ४७०–६०८ मेगाहर्ज ब्रोडकास्ट ब्याण्डमा आधारित रही काम गर्ने एएनआईले उल्लेख गरेको छ ।

खुशटेकका प्रमुख कार्यकारी तथा संस्थापक एरिक शिनले यस फोनले चाँडै बीआईएस सर्टिफिकेसन प्राप्त गर्ने अपेक्षा गरिएको बताएका छन् । यसबाहेक डिटूएम प्रविधि प्रयोगको अनुमति लिन पनि बाँकी नै रहेको जनाइएको छ ।

उनले हालै भारतको आन्ध्र प्रदेशका सूचना प्रविधिमन्त्री नारा लोकेशसँग भेटवार्ता गरी २ करोड अमेरिकी डलर लगानीमा डिटूएम फोन कारखाना स्थापना गर्ने संकेत दिइसकेका छन् । त्यसबाहेक आगामी ५ वर्षमा यस कम्पनीले ८ करोड डलर लगानी गर्ने अपेक्षा गरिएको छ । यससँगै भारतमा कम्पनीको कुल लगानी १० करोड डलर पुग्नेछ ।

उनले आन्ध्र प्रदेशमा नयाँ कारखाना खोल्ने योजना रहेको जानकारी दिए ।