काठमाडौं- नेकपा एमालेका स्थायी कमिटी सदस्य कर्णबहादुर थापाले पूर्वराष्ट्रपति विद्यादेवी भण्डारी राजनीतिमा आइसकेको बताएका छन् ।

पार्टी केन्द्रीय कार्यालय च्यासलमा अध्यक्ष केपी शर्मा ओलीसँग करिब २ घण्टा लामो वार्ता सकिएपछि थापाले अब पूर्वराष्ट्रपतिलाई एमालेले उचित भूमिकासहित अघि बढाउनुपर्ने बताए ।

सञ्चारकर्मीले उनलाई पूर्वराष्ट्रपति राजनीतिमा आउने सम्भावना कति छ ? भनेर सोधेपछि थापाले यस्तो जवाफ दिएका हुन् ।

‘पूर्वराष्ट्रपति राजनीतिमा आइसक्नु भएको छ । अब उहाँबारे पार्टीले निर्णय गर्ने भनेको छ’, उनले भने, ‘पार्टी सचिवालय र पोलिटब्युरोमा पनि यसबारे छलफल भएको छ। अब भोलिदेखि बस्ने केन्द्रीय कमिटीमा पनि कुरा हुनेछ । पार्टीले उचित निर्णय लिने छ।’

उनले आइतबार भएको च्यासलको संवादमा अध्यक्ष ओली र पूर्वराष्ट्रपति भण्डारी दुवैलाई सकारात्मक पाएको बताए ।

‘अध्यक्षको मुड पनि राम्रो थियो । उहाँहरू दुईजना बस्नुअघि हामी पनि बसेर कुरा गर्‍यौँ’, उनले भने, ‘उहाँहरूको मुड हेर्दा सकारात्मक देखेको थिएँ । हार्दिकता र सम्मान देखेको थिएँ । त्यसैले वार्ता पनि पक्कै सकारात्मक र उपलब्धिमुलक भएको हुनुपर्छ ।’

उनले पूर्वराष्ट्रपति भण्डारी राजनीतिमा आइसकेकाले यसबारे पार्टीले भोलिका दिनमा उचित कदम चाल्ने दोहोर्‍याए । ‘भोलि पर्सि के हुन्छ भन्ने कुरा त हामीसँग समय छ । दोस्रो विधान महाधिवेशन र ११ औँ राष्ट्रिय महाधिवेशनमा आउँदैछ’, उनले भने, ‘यसबारेमा प्रस्तावहरू राखिएको छ छलफल हुन्छ । यसबारे यसअघि पनि यस्ता छलफल पहिले पनि भएका थिए । त्यसैले पार्टीले पूर्वराष्ट्रपतिबारे उचित निर्णय लिनेछ ।