काठमाडौं- शनिबार मात्रै सकिएको नेकपा एमालेको पोलिटब्युरो बैठकमा अध्यक्ष केपी शर्मा ओली र अन्य दुई नेताबीच भएको विवाद र चर्काचर्कीले चर्चा पायो ।

त्यसरी ओलीसँग चर्काचर्की गर्नेहरूमध्ये थिए वरिष्ठ उपाध्यक्ष ईश्वर पोखरेर र स्थायी कमिटी सदस्य कर्णबहादुर थापा

पोखरेलले सचिवालय बैठकमा आफू ७० वर्षे र दुई कार्यकालको प्रावधान राख्नु पर्ने पक्षमा रहेको बताउँदै ओलीले अब एमाले अध्यक्षको पद छाड्नुपर्ने बताएका थिए ।

उता स्थायी कमिटी सदस्य थापाले पनि पोलिटब्युरो बैठकमा महाधिवेशनको म्यान्डेटविपरीत विधानमा गरिएको तोडमोडको चर्को आलोचना गरेका थिए ।

उनले ओलीले पार्टीलाई विधान र नीतिले भन्दा व्यक्तिकेन्द्रित बनाएर चलाउन खोजेको भन्दै चर्को आलोचना गरेका थिए । उनले यसो भनेपछि बैठकमा ओलीसँग भनाभनसमेत भएको थियो ।

अर्कातिर उपाध्यक्ष सुरेन्द्र पाण्डेले पनि ओलीको आलोचना गरेका थिए । खासगरि थापाको अभिव्यक्तिलाई लिएर उनीमाथि कारबाही हुनुपर्ने धारण ओलीनिकट नेताहरूले राख्न थालेका छन् ।

यस्तो अवस्थामा आइतबार च्यासलमा पूर्वराष्ट्रपति भण्डारी र अध्यक्ष ओलीबीच वार्ता हुनुअघि गरिएको फोटो सेसन अर्थपूर्ण देखिएको छ ।

जहाँ ओली र भण्डारीसँगै वरिष्ठ उपाध्यक्ष पोखरेल, उपाध्यक्ष पाण्डे, महासचिव शंकर पोखरेल, केन्द्रीय कार्यालय सचिव डा. भीष्म अधिकारी र स्थायी कमिटी सदस्य कर्ण थापा पनि देखिएका छन् ।

पाँच नेतासँग फोटो सेसन गरेपछि अहिले ओली र भण्डारीबीच वार्ता चलिरहेको छ। ओलीले भण्डारीलाई दोस्रो विधान महाधिवेशनमा पनि सहभागी हुन नदिने गरी अघि बढेपछि एमालेमा तरंग छाएको छ ।

अर्कातिर एक वर्षअघि नै नवीकरण गरेको सदस्यतासमेत ओलीले पेन्डिङ भनेपछि भण्डारीसँग तनाव बढ्ने सम्भावना देखिएको छ ।