काठमाडौं- राष्ट्रिय प्रजातन्त्र पार्टी (राप्रपा) ले शुक्रबार जिम्मेवारी मुक्त गरिएका उपाध्यक्ष मुकुन्दश्याम गिरी निर्वाचन आयोगमा पुगेका छन् ।

उनले शुक्रबार पार्टी अध्यक्ष राजेन्द्र लिङ्देनले आफूलाई उपाध्यक्ष र केन्द्रीय सदस्यको जिम्मेवारीबाट हटाउने गरि गरेको निर्णयलाई आयोगमा कानुनी चुनौती दिएका हुन् ।

मनोनित उपाध्यक्ष गिरीले आफूलाई अध्यक्ष लिङ्देनले स्वेच्छाचारी ढंगबाट जिम्मेवारीदेखि हटाएको बताएका छन् ।

उहाँ (अध्यक्ष) ले कसैलाई पदमुक्त गर्न केन्द्रीय कार्यसमितिबाट निर्णय गराएर अनुशासन समितिमा पठाउनुपर्छ’, उनले भने, ‘अनुशासन समितिले छानबिन गर्दा चित्त बुझे नबुझेको विवरण केन्द्रीय समितिमा पठाउनुपर्छ । त्यसपछिमात्रै केन्द्रीय कार्यसमितिले कारबाहीको निर्णय लिने हो ।’

गिरीले लिङ्देन स्वेच्छारी ढंगले चलेको आरोप पनि लगाए । ‘उहाँले स्वेच्छाचारी ढंगले कारबाही गर्न पाउनु हुन्न’, उनले भने, ‘त्यसैले उहाँको स्वेच्छारी कदमविरुद्ध हामीले कानुनी चुनौती दिएका छौँ ।’

यसअघि लिङ्देनले असार २५ गते अनुशासन समितिको अध्यक्षबाट नवराज सुवेदी र प्रवक्ताबाट सगुनसुन्दर लावतीलाई पनि पदमुक्त गरेका थिए । उनीहरूले पनि आयोगमा कानुनी चुनौती दिइसकेका छन् ।

शुक्रबार नै बसेको पार्टीको अनुशासन समितिको बैठकले नीति सिद्धान्त र हितविपरीत हुने गरी कुनै पनि लिखित वा मौखक अभिव्यक्ति नदिन नेता कार्यकर्तालाई निर्देशन पनि दिएको थियो ।