दोलखा– दोलखा धार्मिक तथा पर्यटकीय गन्तव्यहरूले सजिएको हिमाली जिल्ला हो । यहाँ दर्जनौँ पर्यटन सम्भावना बोकेका चर्चित पर्यटकीय स्थलहरू रहेका छन्।उस्तै विश्व चर्चित गन्तव्य हो कालिञ्चाेक ।

काठमाडौंदेखि १ सय ३३ किलोमिटर दुरी र सदरमुकाम चरिकोटबाट १८ किलोमिटर पर्ने कालिञ्चाेक। विभिन्न ऋतुअनुसार सुन्दरता फेरिरहने कालिञ्चाेक वर्षाद्को समयमा पनि निक्कै सुन्दर देखिन्छ ।

पर्यटकहरू यहाँको हरियाली र रंगचंङ्गी फूलहरूको सुन्दरतासँग रमाइरहेका भेटिन्छन् । हिउँदमा सेताम्मे हिउँले सजिने यस क्षेत्र वर्खायामको समय बादलको घुम्टोसँगै खुल्ला आकाश मुनि रहेका हरियाली डाँडाकाँडामा चरिरहेका चौँरी र  फुलेका अनेकौँ थरिका फूलहरूले जोकोहीलाई मन लोभ्याउने गर्छ ।

वर्षायाममा कालिञ्चोकको प्राकृतिक सुन्दरताको अनुभव लिनकै लागि कालिञ्चाेकमा आन्तरिक तथा बाह्य पर्यटक कुरी कालिञ्चाेक पुग्छन् ।
 
कालिञ्चाेकसँगै रहेको कुरी क्षेत्रमा चौरीको ताजा दूध, छुर्पी, घ्यू, सेरगेम लगायतको परिकारको स्वाद लिन यहाँ छिमेकी देश भरतबाट समेत पर्यटक आउने गर्छन् ।

यस क्षेत्रका बनजङ्गलमा यतिबेला उच्च लेकमा पाइने जडिबु पदमचाल फुल्ने बेला भएको हुँदा पनि मानिसहरू यस्ता विभिन्न बहुमूल्य  जडीबुटी खोज्न कालिञ्चाेक पुग्छन् । साथै बिदा र छुट्टीको समय  युवा पुस्ता बढी मात्रमा कालिञ्चोक घुम्न पुग्ने गरेका छन् ।

कालिञ्चाेकमा वास बस्नको लागि सुविधा सम्पन्न दर्जनौँ होटेल भएकाले पनि यहाँ नेपालका विभिन्न जिल्लाबाट तथा भारतबाट पर्यटकहरू प्याकेजनै बनाएर घुम्न पुग्ने गर्छन् । 

तस्बिरहरू : सुवास बस्नेत/दोलखा