काठमाडौं – मौसम विज्ञान विभागले आइतबार देशका विभिन्न ठाउँमा भारी वर्षाको पूर्वानुमान गरेपछि प्रधानमन्त्री केपी शर्मा ओलीले विपदबाट बच्न अनुरोध गरेका छन्।

आइतबार बिहानै सामाजिक सञ्जाल फेसबुकमार्फत् ओलीले यस्तो अनुरोध गरेका हुन्। प्रधानमन्त्रीको अनुरोधमा विपदबाट बच्न सुरक्षा निकायले जारी गरेका सूचना पालना गर्नुपर्ने उल्लेख छ।

त्यसैगरी, प्रधानमन्त्रीले अत्यावश्यकबाहेक लामो यात्रा नगर्न र सुरक्षित स्थानमा रहनसमेत अनुरोध गरेका छन्। उनले आवश्यक सुरक्षाको तयारी अवस्थामा रहन सुरक्षाकर्मीलाई निर्देशनसमेत दिएका छन्।

प्रधानमन्त्री ओलीले फेसबुकमा लेखेका छन्, ‘मौसम विज्ञान विभागले आज दिउँसो देशका विभिन्न स्थानहरूमा भारी वर्षा हुने अनुमान गरेको छ। मौसमजन्य विपतबाट बच्न सुरक्षा निकायले आवश्यक सतर्कताका लागि जारी गरेको सूचनालाई पालना गरौं। अत्यावश्यक बाहेक लामो यात्रा नगर्न र सुरक्षित स्थानमा रहन अनुरोध गर्दछु। सुरक्षाकर्मीहरुलाई आवश्यक सुरक्षाको तयारी अवस्थामा रहन निर्देशन गर्दछु।’