सुनसरी– प्रहरीले गाँजा तस्करीमा संलग्न भएको आरोपमा फरार भएका एक युवालाई विहीबार साँझ पक्राउ गरेको छ । करिव एक महिना अघि नै फरार भएका मोरङको बुढीगंगा गाउपािलका–४ बस्ने चिन भन्ने २८ वर्षीय नसरुद्दिन मियालाई पक्राउ गरिएको प्रहरीले जनाएको छ । मिया गत जेठ ६ गते बा ७ ९२६३ नम्बरको मारुती सुजुकी कार चलाएर सुनसरीबाट बुढीगंगा तर्फ गइरहेका बेला प्रहरीले खेदाउँदा खेदाउँदै फरार भएका थिए । उनी दुहवी नगरपालिका–४ मालहट्टीमा कार रोकेर फरार भएका थिए । 

उनले चलाएको कारको डिकी भित्रबाट प्रहरीले ११६ केजी गाँजा बरामद भएको थियो । जेब्रा झोलामा प्याक गरिएको गाँजा मियाले धनकुटाको दक्षिणी भेगका पालिकाबाट ल्याएका थिए । उक्त गाँजा भारतीय बजारमा तस्कर गर्न मियाले कार प्रयोग गरेको प्रहरीले जनाएको छ । 

कार र गाँजा छाडेर फरार रहेका मियालाई प्रहरीले कारकै नम्बर र व्लु बुकको आधारमा खोजतलास गर्दा उनी दुहवीकै मालहट्टी आसपास लुकेर बसेको सुराक पाएपछि थप खोजवीन गर्दा पक्राउ परेका हुन् । प्रहरीले सुनसरी जिल्ला अदालतबाट सात दिनको म्याद थप गरी अनुसन्धान सुरु गरेको छ ।