काठमाडौं– महिलाहरू घरभित्रै असुरक्षित हुने गरेको डरलाग्दो तथ्याङ सार्वजनिक भएको छ । महिला पुनर्स्थापना केन्द्र (ओरेक) ले ७१ प्रतिशत महिला हिंसा घरभित्रै हुने गरेको प्रतिवेदन सार्वजनिक गरेको हो । 

ओरेकले २०२५ जनवरीदेखि मार्चसम्म तीन महिनाको अवधिमा महिला हिंसाको घटनाहरू संकलन गरेको थियो । जसमा ७१.४२ प्रतिशत घरेलु हिंसा, १९.०४ प्रतिशत यौन हिंसा र ३.५७ प्रतिशत सामाजिक हिंसा रहेका छन् ।

कोशी प्रदेशका (उदयपुर, सुनसरी र मोरङ) तीन जिल्लामा महिला हिंसासम्बन्धी कुल ८४ वटा घटना लैङगिक विभेदको तथ्याङ अभिलेख गरेको हो । 

यो सार्वजनिक भएका तथ्याङ मात्र हो । घरेलु हिंसालाई निजी मामिलाको रूपमा लिने, महिलाले सहनुपर्छ भन्ने पितृसत्तात्मक सोच, हिंसालाई बाहिर ल्याउँदा समाज र परिवारबाट भोग्नुपर्ने लाञ्छना र झन्झटिलो न्यायिक प्रक्रियाले गर्दा यस्तो सयौँ घटना बाहिर आउन नसकेको ओरेकको अध्ययनले बताउँछ ।