काठमाडौं– आइतबार सांझ ५:३०  बजे धादिङ जिल्ला  बेनिघाट रोराङ्ग गाउंपालिका-७ स्थित त्रिशुली नदीमा मोटरसाइकलसहित खसेका १ व्यक्तिको उद्धार कार्य भइरहेको छ ।

डिएसपी शैलेन्द्र थापाका अनुसार २ जना सवार मोटरसाइकल नदीमा खसेको खबर प्राप्त भएपश्चात् खोजि कार्यको लागि सशस्त्र प्रहरी बल विपद् व्यवस्थापन तालिम शिक्षालय कुरिनटारबाट सशस्त्र प्रहरी निरीक्षक अस्मित कुमार चौहानको कमाण्डमा गोताखोर सहितको सुरक्षा फौज परिचालन भएको थियो । 

गोताखोर सहितको सुरक्षाफौजले सडकबाट करिब १ सय ५० मिटर तल भिरबाट रोप रेस्क्यु र स्टेचरको प्रयोग गरेर मोटरसाइकल र घाइतेलाई माथि ल्याउने कार्य गरिरहेका छन् । 

खोजतलासको क्रममा बा. प्र. ०२-०२४ प ४०५४ नम्बरको मोटरसाइकल र एक व्यक्तिको उद्धार भइरहेको हो । ती व्यक्तिको साथबाट मीन बहादुर तामाङ लेखिएको यातायातसँग सम्बन्धित नगदी रसिद फेला परेको छ । अर्का व्यक्ति पनि बेपत्ता भएको आशंकामा   सशस्त्र प्रहरी बलको गोताखोरले खोजी गरिरहेको छ ।