काठमाडौं – आतंकवादका विरुद्धमा सहकार्यलाई वृद्धि गर्न भारत र न्युजिल्याण्ड सहमत भएका छन् । न्युजिल्याण्डका प्रधानमन्त्री क्रिस्टोफर लक्सनको भारत भ्रमणका क्रममा दुई मुलुक आतंकवादलाई निरुत्साहित गर्नका लागि सहकार्यलाई अभिवृद्धि गर्न सहमत भएका हुन् ।

भारतीय समाचार संस्था एएनआईका अनुसार लक्सनसँगको भेटवार्तापछि भारतीय प्रधानमन्त्री नरेन्द्र मोदीले दुबै मुलुकले आतंकवादी आक्रमणको सामना गर्दै आएको उल्लेख गरे । सन् २०१९ मा न्युजिल्याण्डको क्राइस्ट चर्च आक्रमण र २६/११ मुम्बई हमलाको प्रसंग उल्लेख गर्दै आतंकवाद दुबै मुलुकको साझा चुनौतीको विषय रहेको बताए ।

दुई नेताले द्विपक्षीय तथा बहुपक्षीय माध्यमबाट हिंसात्मक अतिवाद र आतंकवादविरुद्ध सहकार्य गर्न सहमति जनाएका हुन् । भेटवार्ताका क्रममा व्यापार, लगानी, रक्षाजस्ता क्षेत्रमा सहकार्य बढाउने विषयमा पनि सहमत भएको एएनआईले जनाएको छ ।