काठमाडौं– नेपाल दलित मुक्ति मोर्चाले सिरहाको औरही गाउँपालिकाका दीपक मरिक डोमको घर भत्काइएको घटनाप्रति आपत्ति जनाएको छ ।

मोर्चाले आज एक प्रेस विज्ञप्ति जारी गरी पूर्वपश्चिम हुलाकी राजमार्ग अन्तर्गत औरही- ५ स्थित सडक किनारमा रहेको छाप्रो महायज्ञका नाममा भत्काइएको भन्दै आपत्ति जनाएको हो ।

उक्त स्थलमा यही चैत १७ गतेदेखि श्री श्री १०८ विष्णु महायज्ञ आयोजनाको नाममा गाउँपालिकाका अध्यक्ष शिवजी यादवको पहलमा जेसीभी लगाएर घर भत्काइएको मोर्चाले उल्लेख गरेको छ ।

महायज्ञ आयोजना गर्ने स्थानमा अछूत डोम राख्न नहुने भनेर यज्ञका कर्ताधर्ता मानिएका महात्यागी बजरंगी बाबाको निर्देशनमा पालिका अध्यक्ष यादवले घर भत्काउन लगाउँदा पनि सरकार मुकदर्शक बनेको मोर्चाको दाबी छ ।

नेपाल जातीय विभेद तथा छुवाछुतमुक्त राष्ट्र घोषणा भएको दुई दशक हुन लाग्दा पनि दलित भएकै कारण बस्ती उठाउनु अमानवीय कार्य भएको जनाएको छ ।

मोर्चाले उक्त घटनाको सत्यतथ्य छानबिन गरी दोषीमाथि कडा कारबाही गर्न माग गर्दै विस्थापित परिवारको स्थायी र व्यवस्थित बसोबासको व्यवस्था गर्न सरकारसँग माग गरेको छ ।