पोखरा- पोखरामा आयोजित भ्रमण वर्ष २०२५ को उद्घाटन समारोहमा हाइड्रोजन ग्यास भरिएका बेलुन विस्फोट घटनामा पक्राउ परेका एकजना भारतीय नागरिक साधारण तारेखमा रिहा भएका छन् ।

जिल्ला प्रशासन कार्यालय कास्कीले बेलुनमा हाइड्रोजन ग्यास भरेर बेचेको आरोपमा पक्राउ परेका भारतीय नागरिक कमलेश कुमारलाई साधारण तारेखमा छाड्न आदेश दिएको छ ।

कास्कीका सहायक प्रमुख जिल्ला अधिकारी एवम् सूचना अधिकारी शिव लम्सालले कमलेशलाई नियमित हाजिर हुने गरी साधारण तारखेमा छाड्ने आदेश भएको जानकारी दिएका छन् ।

वडा प्रहरी कार्यालय, बैदामले पक्राउ गरेर जिल्ला प्रशासन कार्यालयमा मुद्दा चलाइएका ४१ वर्षीय कमलेश कुमारलाई बिहीबार साधारण तारेखमा रिहा गर्न आदेश भएको हो ।

गत फागुन ३ गते भ्रमण वर्ष उद्घाटन समारोहका क्रममा हाइड्रोजन भरिएको बेलुनमा ब्यानर टाँसेर उडाउन खोज्दा स्पार्किङ मेसिनबाट निस्किएको झिल्को लागेर विस्फोट भएको थियो । प्रहरीका अनुसार फागुन ३ मै कमलेशलाई नियन्त्रणमा लिएर मुद्दा अघि बढाइएको थियो ।

• पोखरा घटना : बेलुनमा हाइड्रोजन भर्ने भारतीय पक्राउ

• चरम लापरबाही गर्दा दुर्घटनामा परे मन्त्री र मेयर (तस्बिरहरू)

बेलुन विस्फोटको घटनामा अर्थमन्त्री विष्णुप्रसाद पौडेल र पोखराका मेयर धनराज आचार्य घाइते भएका थिए । अर्थमन्त्री पौडेल र मेयर आचार्य दुवैजना उपचारपछि कीर्तिपुर अस्पतालबाट डिस्चार्ज भइसकेका छन् ।

पक्राउ परेका कमलेशसँग हाइड्रोजन उत्पादन, भण्डारण र बलुन भर्ने प्रक्रियाबारे जानकारी मागिएको थियो । उता गृहमन्त्री रमेश लेखकले कास्कीका प्रमुख जिल्ला अधिकारी भरतमणि पाण्डेको संयोजकत्वमा छानबिन समिति पनि बनाएका थिए ।

समितिलाई घटनाको विस्तृत अध्ययन गरी १५ दिनभित्र गृह मन्त्रालयमा प्रतिवेदन पेस गर्ने निर्देशन दिइएको छ। गृमन्त्रीले आगामी दिनमा हाइड्रोजन ग्यासको नियमनका लागि आवश्यक उपायहरूसमेत सिफारिस गर्न निर्देशन दिएका थिए ।