काठमाडौं- उपप्रधान एवम् अर्थमन्त्री विष्णु पौडेलले बैंकहरूको कर्जा प्रवाहमा समस्या रहेको बताएका छन् ।

कृषि विकास बैंक लिमिटेडको ५८ औँ वार्षिकोत्सवलाई सोमबार सम्बोधनका क्रममा अर्थमन्त्री पौडेलले बैंकहरूको निक्षेपको अनुपात बढे पनि कर्जा प्रवाह हुन नसकेको बताएका हुन् ।

अर्थमन्त्री पौडेलले कृषि उत्पादन, उत्पादकत्व र रोजगारी सिर्जनामा बैकंहरूले लगानी गर्नुपर्नेमा जोड दिएका छन् ।

उनले बैंकको व्यवस्थापन र कर्मचारीबीचको सम्बन्ध सुमधर हुन नसक्दा उद्देश्य हासिल हुन नसकेको बताए ।

बैंकको क्षमता, सामर्थ्य र प्रतिष्ठा पहिलो प्राथमिकतामा राखी, कार्यसूची बनाई अगाडि बढ्न सबै कर्मचारीलाई उनले आग्रह गरे ।

बैंक प्रभावकारी रुपमा अगाडि बढ्दा समग्र कर्मचारीकै प्रतिष्ठामा वृद्धि हुने उनको तर्क थियो ।

कार्यक्रममा नेपाल राष्ट्र बैंकका गर्भनर महाप्रसाद अधिकारीले बैंकहरूमा अराजक प्रवृत्ति मौलाएको बताए ।

ऋण लिइसकेपछि तिर्दिनँ भन्ने परिपाटी विकास हुँदा अर्थतन्त्रमा केही समस्या देखिएको उनले बताएका छन् ।

यद्यपि यसका बावजुद पनि समग्र मुलुकको अर्थतन्त्र सुधारउन्मुख रहेको उनले उल्लेख गरेका छन् ।

मुलुकको राजस्व, तरलतामा वृद्धि वित्तीय व्यवस्थापनमा सुधार भइरहेको गर्भनर अधिकारीले बताएका छन् ।

उक्त अवसरमा कार्यसम्पादनमा उत्कृष्ट कृषि बैंकका कर्मचारीहरुलाई सम्मान गरिएको थियो ।