काठमाडौं – ‘फर्की फर्की’का निर्माता रोहित अधिकारीको नयाँ फिल्ममा ‘माइतीघर’मा नायक धिरज मगरको प्रवेश भएको छ । निर्माण पक्षले सोमबार धिरजसँग कागजी सम्झौता भएको जानकारी दिएको हो ।

धिरज मुख्य भूमिकामा प्रवेश भएसँगै कलाकारहरूको लाइनअप पूरा भएको निर्माण पक्षको भनाइ छ । यसअघि फिल्मको मुख्य भूमिकाका लागि केदार घिमिरे ‘माग्ने बूढा’ र गायक/नायक प्रकाश सुपुत अनुबन्ध भएका थिए ।

फिल्ममा नायिकाहरू उपासना सिंह ठकुरी र नव नायिका दिकिला शेर्पा फाइनल भइसकेका छन् । त्यस्तै; सहायक भूमिकाका लागि कलाकार बुद्धि तामाङ अनुबन्ध भएका छन्‌ ।

यस फिल्मका निर्देशक मिलन थापा हुन् । चन्द्रकुमार दोङको कथा रहेको यस फिल्मको संवाद रामशरण पाठकले लेखेका हुन् ।

अहिलेसम्म फिल्म छायाङ्कन मिति टुङ्गो लागेको छैन । केही महिनामा छायाङ्कन सुरु गर्ने योजनामा निर्माण पक्षको छ ।

तर, रोहितले फिल्मको प्रदर्शन मिति भने आगामी दशैंको फूलपातीलाई तोकेका छन् । अन्य फिल्म उक्त समयमा प्रदर्शन आए पनि ‘माइतीघर’को प्रदर्शन मिति हेरफेर नहुने रोहितको दाबी छ ।