काठमाडौं- माधवकुमार नेपाल नेतृत्वको नेकपा (एकीकृत समाजवादी) पार्टीको वार्षिक लेखापरीक्षण प्रतिवेदन सोमबार सार्वजनिक गरिएको छ।

आलोकनगरस्थित पार्टी केन्द्रीय कार्यालयका लेखा प्रमुख खेमराज पौडेलले लेखापरीक्षण प्रतिवेदन सार्वजनिक गरेका हुन् ।

आर्थिक वर्ष २०८०/०८१ को आयव्ययको लेखापरीक्षण प्रतिवेदन सार्वजनिक गरिएको प्रमुख पौडेलले जानकारी दिएका छन् ।

प्रतिवेदनअनुसार समाजवादीले गत आर्थिक वर्षमा ४ करोड २४ लाख ५३ हजार ६ सय ९१ रुपैयाँ आम्दानी गरेको छ । पौडेलका अनुसार खर्चतर्फ ४ करोड ५७ लाख ४० हजार ८ सय ५४ रूपैयाँ रहेको छ ।

पौडेलका अनुसार गत आर्थिक वर्षमा समाजवादीको सञ्चालन खर्च ३२ लाख ८७ हजार १६४ रूपैयाँले घाटामा रहेको लेखापरीक्षण प्रतिवेदनमा उल्लेख छ।

पार्टीको यस आर्थिक वर्षको लेखापरीक्षण प्रतिवेदनमा २०८० असोजमा सञ्चालित मेची-महाकाली जागरण अभियान, २०८१ जेठमा सम्पन्न पार्टीको दशौँ राष्ट्रिय महाधिवेशन र यसैवर्ष सम्पन्न स्थानीय तहको उपनिर्वाचनमा भएको खर्च विवरण उल्लेख छ।

सदस्यता, लेबी, प्रकाशन विक्री, महाधिवेशन प्रतिनिधि शुल्क, अन्य नियमित सहयोग पार्टीको मुख्य आम्दानीको श्रोत रहेको प्रमुख पौडेलले जानकारी दिएका छन् ।