काठमाडौं- राष्ट्रिय स्वतन्त्र पार्टी (रास्वपा)का सभापति रवि लामिछाने शुक्रबार अपरान्ह थुनामुक्त भएका छन्।

सहकारी ठगीको मुद्दामा ललितपुरस्थित नख्खु कारागारमा रहेका उनी रुपन्देही जिल्ला अदालतबाट पूर्जी लिएर औपचारिक रुपमा जेलबाट मुक्त भएका हुन् ।

उच्च अदालत तुलसीपुरको बुटवल इजलासले बिहीबार रविलाई शर्तसहित थुनामुक्त गर्न आदेश दिएको थियो।

नख्खु जेलबाट रिहा भएपछि लामिछानेलाई प्रहरी साथमा लगाएर शुक्रबार चितवनको भरतपुर हुँदै स्थलमार्गबाट भैरहवा पुर्‍याइएको थियो ।

अदालतको आदेशपछि अब रविले जेलबाहिर रहेरै आफ्ना गतिविधि गर्न पाउनेछन् । उनलाई अदालतले विदेश जाँदा भने अनुमति लिनुपर्ने शर्त राखेको छ।

यसअघि भदौ २४ गतेको जेन-जी आन्दोलनका क्रममा रविलाई रास्वपाका कार्यकर्ताले बलजफ्ती निकालेका थिए । तर, उनले केही दिनमै फेरि नख्खुमै फर्किनु परेको थियो ।