काठमाडौं- नेकपा एमालेका अध्यक्ष केपी शर्मा ओलीले महाधिवेशनसंगै पार्टी थप एकताबद्ध र बलियो भएर अघि बढ्ने बताएका छन् ।

शुक्रबार काठमाडौंमा बसेको एमाले केन्द्रीय कमिटीको प्रथम बैठकलाई सम्बोधन गर्दै अध्यक्ष ओलीले महाधिवेशनसँगै प्यानल वा गुट-उपगुटका कुरा अन्त्य भइसकेको बताए ।

उनले अब सबैजनालाई समेटेर पार्टी थप एकताबद्ध र बलियो भएर अघि बढ्ने बताएका छन् ।

पार्टीभित्रका असन्तुष्टि पार्टीका बैठकमा राख्न निर्देशन दिँदै उनले सञ्चारमाध्यममा पार्टीमाथि आँच पुग्ने कुरा नगर्न निर्देशनसमेत दिए ।

अध्यक्ष ओलीले पार्टी अध्यक्षविरुद्ध पटक पटक हमला हुने गरेको भन्दै नेतृत्वप्रति अनास्था जगाउन पार्टी एकतामा खलल पुर्‍याउन उचाल्ने कुरामा प्रभावित नहुने आग्रह गरे।

देश अप्ठेरो अवस्थामा परेका बेला एमालेबाहेक अन्य कुनै दल बोल्न नसकेको उनको भनाइ छ । उनले जेन-जी आन्दोलनका क्रममा सुनियोजित रुपमा भयानक षडयन्त्र भएको र देशलाई नै शताब्दी पर धकेल्ने काम भएको बताए ।

ओलीले देशमा लोकतन्त्र फर्काउने कामको नेतृत्व एमालेले गर्नुपर्ने बताए । केन्द्रीय कमिटीको प्रथम पार्टीको केन्द्रीय कमिटीको दोस्रो पूर्ण बैठक पुस २६, २७ र २८ गते बस्ने एमालेले जनाएको छ ।