काठमाडौं- अखिल नेपाल फुटबल संघ (एन्फा) ले महासचिव किरण राईलाई निलम्बन गरेको छ।

एन्फाका कार्यवाहक अध्यक्ष वीर बहादुर खड्काले आइतबार राईलाई आजदेखि लागू हुनेगरी अर्को कार्यसमिति बैठकसम्मका लागि महासचिव पदबाट निलम्बन गरिएको जानकारी दिएका हुन्।

राईसँग संघको विधान, विधि र पद्धति विपरीत कार्य गरेको विषयमा ३ दिनभित्र स्पष्टीकरण सोधिएको थियो। तर उक्त समयमा राईले कुनै जवाफ नदिएकाले उनलाई निलम्बन गरिएको एन्फाले जनाएको छ।

पत्रमा भनिएको छ, ‘संघको साधारण सभा र कार्यसमितिको म्यान्डेटलाई वेवास्ता गर्दै फुटबल खेलको विकासमा दीर्घकालीन असर पार्ने गरी कार्य गर्नुभएकोमा त्यस सम्बन्धमा स्पष्टिकरण मागिएको थियो। उक्त समयमा जवाफ नआएकाले आजदेखि लागू हुने गरी तपाईंलाई महासचिव पदबाट अर्को कार्यसमिति बैठकसम्मका लागि निलम्बन गरिएको जानकारी गराउँछौं।’

संघले निलम्बन अवधिसम्मका लागि सहायक महासचिव दामोदर भट्टराईलाई कार्यवाहक महासचिवको जिम्मेवारी दिइएको जनाएको छ। एन्फाको यो निर्णयबारे महासचिव किरण राईको प्रतिक्रिया आएको छैन।

एन्फा फिफा, एएफसी तथा राष्ट्रिय खेलकुद परिषद् (राखेप) बाट मान्यता प्राप्त निकाय हो।