कञ्चनपुर – शुक्लाफाँटा नगरपालिका–१० झलारीमा आज सम्पन्न निःशुल्क आँखा शिविरबाट पाँच सय ६५ जना लाभान्वित भएका छन् ।

नेपाल नेत्रज्योति सङ्घ गेटा आँखा अस्पताल र शुक्लाफाँटा–१० वडा कार्यालयको सहकार्यमा शिविर सञ्चालन गरिएको हो ।

गेटा आँखा अस्पतालका नेत्र अधिकृत नरेन्द्र विष्टका अनुसार जाँचका लागि आएका बिरामीमध्ये ८९ जनामा मोतियाविन्दुको समस्या देखिएको छ ।

“मोतियाविन्दु भएका बिरामीको निःशुल्क शल्यक्रियाको व्यवस्था मिलाइएका छौँ”, उनले भने, “आइतबार, मङ्गलबार र बुधबार गरी तीन दिनमा शल्यक्रिया गरिने छ ।”

बिरामीलाई अस्पतालसम्म ल्याउन–लैजान गाडीको व्यवस्था गरिएको उनले जानकारी दिए । शिविरमा उपचारका लागि आएका एक सय ७९ जनालाई निःशुल्क चश्मा वितरण गरिएको छ भने चार सय ७४ जनालाई परामर्शसहित औषधि वितरण गरिएको नेत्र अधिकृत विष्टले बताए।

वडाध्यक्ष लालबहादुर ऐरका अनुसार निःशुल्क आँखा शिविरबाट वडाभित्रका मात्र नभई आसपासका बासिन्दाले लाभ लिएका छन् । उनले शिविरमा महिलाको सहभागिता पुरुषको तुलनामा तीन गुणा बढी रहेको उल्लेख गरे ।