दोलखा– जिल्लाको जिरी नगरपालिकामा जंगली जनावर भालु आतङ्क दैनिक बढ्न थालेको छ । पछिल्लो २४ घण्टामा यहाँ दुई जना भालुको आक्रमणबाट गम्भीर घाइते भएका छन् । 

जङ्गल चार्दै बस्ती पुगेको भालुले बिहीबार र शुक्रबार दिउँसो दुई जना पुरुषलाई घाइते बनाएको जिल्ला प्रहरी कार्यालय दोलखाले जनाएको छ । घाइते हुनेमा जिरी नगरपालिका वडा नम्बर-८ बस्ने ३८ वर्षीय दिलीप लामा रहेका छन् ।

शुक्रबार दिउँसो करिब १ बजे भालुखोप जंगलमा घाँस काट्न जाने क्रममा अचानक जङ्गली भालुको आक्रमणबाट उनी घाइते भएका थिए । 

जिल्ला प्रहरी कार्यालय दोलखाका प्रहरी निरीक्षक श्रीराम तिमल्सीनाका अनुसार लामाको दायाँ हातको चोरी औँला भाँचिएको, पाखुरा, कुइना र टाउकोमा चोट लागेको छ भने बोल्न सक्ने मध्यम खालको अवस्था रहेको छ ।

घाइते लामालाई वैतेश्वरको मैनापोखरीस्थित स्थानीय दाहाल मेडिकलमा सामान्य उपचार गरी थप उपचारका लागि काठमाडौं रिफर गरिएको प्रहरीले जनाएको छ ।

बिहीबार दिउँसो भालुको आक्रमणबाट घाइते भएका सोही वडाका अर्का स्थानीय दावा शेर्पालाई पनि थप उपचारको लागि काठमाडौं रिफर गरिएको थियो । उनीहरू दुवै जनाको शरीरका विभिन्न भागमा भालुको आक्रमणबाट गम्भीर गहिरो चोट लागेको दाहाल मेडिकल सेन्टर मैनापोखरीका इन्चार्ज किशोर दाहालले जानकारी दिए । 

जङ्गल चार्दै जिरी पुग्यो भालु

गत महिना जिल्लाको गौरीशंकर गाउँपालिकामा पनि दुई जना भालुको आक्रमणबाट गम्भीर घाइते भएका थिए । गौरीशंकर-१ का चेतबहादुर कार्कीसहित सोही वडा अर्का एक स्थानीयलाई भालुले आक्रमण गरेको थियो । त्यस अघि पनि भालुको आक्रमण परेर एक जनाको मृत्यु भएको बुझिएको छ ।

असार र साउनमा गौरीशंकरको जुँगु र वैतेश्वरको एवो लगायतको क्षेत्रमा देखिने उक्त भालु अहिले स्थानीय जङ्गल चार्दै जिरी पुगेको स्थानीयहरू बताउँछन् । 

भदौ महिनामा गौरीशंकर तथा वैतेश्वरमा नदेखिएको उक्त भालु पछिल्लो केही दिन यता जिरीको वडा नम्बर-८ का स्थानीय जङ्गलमा देखिन थालेको र स्थानीयलाई आक्रमण गर्न थालेको स्थानीयहरू बताउँछन् । हिजोआज यहाँका स्थानीय भालुको आतंकबाट त्रसित छन् । 

स्थानीयहरू एक्लादुग्लै हिँडडुल गर्न, पानी पँधेरो, घरायसी काम दाउरा, घाँस, सोत्तर लगायतका काम गर्न समेत डराउनु पर्ने स्थिति रहेको बताउँछन् । सुवाश बस्नेत/दोलखा