काठमाडौँ-नेकपा एमालेका केन्द्रीय सदस्य विष्णु रिजालले पार्टी कार्यक्रममा युवाको उपस्थिति दिनानुदिन न्यून हुँदै गएको भन्दै चिन्ता व्यक्त गरेका छन्।

संविधान दिवसको अवसरमा शुक्रबार च्यासलमा एमालेले गरेको कार्यक्रममा सहभागी रिजालले यस्तो टिप्पणी गरेका हुन् ।

उनले कार्यक्रममा सहभागी भएपछि फेसबुकमा टिप्पणीसहित लेखेका, ‘पहिले–पहिले बुढापाका भेटिए हतार–हतार मञ्चमा लिएर आसनग्रहण गराइन्थ्यो। अहिले त्यसरी आसनग्रहण गराउन पनि युवा भेटिँदैनन् । जेन–जी पुस्ता त परको कुरा।’

भदौ २३ र २४ गते भएको जेन–जी आन्दोलनपछि एमालेले पहिलो पटक सार्वजनिक कार्यक्रम आयोजना गरेको हो।

तर उक्त कार्यक्रममा पार्टी अध्यक्ष एवम् पूर्वप्रधानमन्त्री केपी शर्मा ओली अनुपस्थित रहे। कार्यक्रममा वरिष्ठ उपाध्यक्ष ईश्वर पोखरेल, महासचिव शंकर पोखरेलसहितका नेताहरू उपस्थित थिए।

रिजालको टिप्पणीले एमालेभित्र युवाको आकर्षण र सहभागिताबारे प्रश्न उठाएको छ। हालको राजनीतिक घटनाक्रममा जेन–जी पुस्ताको सक्रियता बढ्दै गएको चर्चा भइरहेका बेला एमालेको कार्यक्रममा युवाको न्यून उपस्थिति देखिनु पार्टीका लागि चुनौतीको संकेत मानिएको छ।