काठमाडौँ- नेकपा एमालेका युवा नेता सुहाङ नेम्वाङले भदौ २३ र २४ गते भएको जेन-जी विद्रोपछिको आवेग र प्रतिशोधको वातावरणबारे चिन्ता जनाउँदै संयमित हुन आग्रह गरेका छन्।

जेनजीहरूको भावना सम्मान गर्नुपर्ने बताउँदै उनले उनीहरूमाथि अभियोग लगाउनु आफ्नै सन्ततीलाई गाली गर्नु जस्तै भएको बताए ।

इलामबाट निर्वाचिन पूर्वसांसद् नेम्वाङले भनेका छन्, ‘अग्रज र नौजवान साथीहरूलाई फेरि पनि भन्छु–अब आवेग, उत्तेजना र प्रतिशोध त्यागौँ।’

जेनजी विद्रोह हुने परिस्थितिसम्मको गल्तीमा आफ्नो भागको जिम्मेवारी लिन तयार रहेको पनि उनले बताएका छन् ।

स्वर्गीय एमाले उपाध्यक्ष सुवासकुमार नेम्वाङका छोरा उनले भनेका छन्, ‘यो अवस्था निर्माणमा मेरो पनि अलिकति भूमिका रह्यो होला। यदि रहे मेरो भागमा कति पर्छ कुन्नि? यो कमजोरी र नालायकीप्रति म माफी माग्छु,’ उनले भनेका छन्, ‘गल्ती नेतृत्वमा बस्नेबाटै हुन्छन्, आत्मालोचना र स्वीकारोक्ति जरुरी छ। जनतालाई माफी मागेर सँच्चिने प्रण गर्नु नै हाम्रो महानता हो।’

जेन-जीहरू आफ्नै सन्तान भएकाले उनीहरूको भावनाको सम्मान गरेर जानुपर्ने उनले बताए ।

‘आफ्नो अस्तित्व र अधिकारका लागि सडकमा आएका जेन-जीहरूलाई उत्तेजनापूर्ण आरोप लगाउनु आफ्नै सन्ततीहरूलाई गाली गर्नु हो,’ उनले भने, ‘आफ्नै सन्ततीलाई गाली गर्नेहरू जिम्मेवार अभिभावक हुन सक्दैनन्।’