काठमाडौं – असोज १३ अर्थात् आगामी फूलपातीबाट प्रदर्शनमा आउन लागेको फिल्म ‘माइतीघर’को ट्रेलर सार्वजनिक भएको छ । निर्माण पक्षले बिहीबार बानेश्वरको एक फिल्म हलमा कार्यक्रमको आयोजना गरी ट्रेलर सार्वजनिक गरेको हो ।

सामाजिक कथामा बनेको यस फिल्मको ट्रेलरमा फिल्मका शीर्ष कलाकारहरु नायकहरु धिरज मगर, प्रकाश सपुत, नायिका उपासना सिंह ठकुरी र कलाकार केदार घिमिरेलाई प्रमुख स्थान दिइएको छ ।

फिल्मको कथा त्रिकोणात्मक प्रेमकथा रहेको ट्रेलरले स्पष्ट पारेको छ । नायक प्रकाश र नायिका उपसनाको प्रेममा धिरजको प्रवेश भएपछि उत्पन्न परिस्थिति ट्रेलरमा देखाइएको छ ।

ट्रेलरको अन्तिममा प्रकाश र धिरजको फाइटको दृश्य राखिएको छ । प्रेमकै लागि दुईको झगडा परेको हुन्छ ।

ट्रेलर हेर्दा केदार घिमिरे भने यस फिल्ममा सहायक भूमिकामा रहेको बुझ्न सकिन्छ । उनी हाँस्य भूमिकामा रहेका छन् । ‘छक्का पञ्जा’ सिरिजबाट चर्चामा आएको उनको ‘हल्का रमाइलो’ भन्ने संवाद यस फिल्ममा पनि समावेश गरिएको छ ।

यो फिल्म मिलन तामाङको निर्देशनमा बनेको हो भने लेखक रामशरण पाठक हुन् । रोहित अधिकारी प्रस्तुतकर्ता रहेको यो फिल्मको निर्माताहरु रविन शेरचन र धिरज तामाङ हुन् ।

यो फिल्मले हलमा अन्य फिल्मसँग बक्स अफिस प्रतिस्पर्धा गर्दैछ । यही मितिमा फिल्महरु ‘बलिदान’, ‘अभिमन्यु’ र ‘हरिबहादुरको जुत्ता’ प्रदर्शनमा आउँदैछन् ।

ट्रेलर :