एजेन्सी : अमेरिकी राष्ट्रपति डोनाल्ड ट्रम्पले रूससँग युद्धरत युक्रेनको सुरक्षा गर्न अमेरिकी सैनिक नपठाउने बताएका छन् ।

फक्स न्यूजसँग कुराकानी गर्दै राष्ट्रपति ट्रम्पले युक्रेनी राष्ट्रपति भ्लोदिमिर जेलेन्स्कीले गर्नुपर्ने काम गर्ने र रूससँग वार्ताका सन्दर्भमा लचिलोपना देखाउनुपर्ने पनि बताए ।

‘जेलेन्स्की र रूसी राष्ट्रपति भ्लादिमिर पुटिन कहिले सबैको असल मित्र बन्न सक्छन्, यो म भन्न सक्दिनँ’, ट्रम्पले भने, ‘आवश्यक निर्णय उनीहरूले नै लिने हो ।’

ट्रम्पलाई पुटिनसँगको भेटवार्तापछि अब जेलेन्स्कीसँगको सम्भावित बैठकबारे सोधिएको थियो । जवाफमा ट्रम्पले हिजोमात्रै पुटिनलाई फोन गरेको र आफू पुटिनको व्यवहार राम्रो हुनेमा आशावादी रहेको पनि बताए ।

उनले थपे, ‘यदि यस्तो भएन भने स्थिति थप कठिन हुनेछ ।’