काठमाडौं- उपसभामुख इन्दिरा राना मगरलाई हटाउन महाभियोग लगाउने प्रयोजनका लागि प्रमुख सत्तारुढ नेपाली कांग्रेस र नेकपा एमालेले आफ्ना सांसदसँग हस्ताक्षर संकलन गरेका छन् ।

संघीय संसद्का सदस्यहरूलाई मंगलबार बिहान सिंहदरबारमा बोलाएर दुवै दलले हस्ताक्षर लिएका हुन् । उनीहरूलाई के प्रयोजनका लागि हो भन्ने नखुलाई खाली कागजमा हस्ताक्षर गर्न लगाइएको हो ।

हस्ताक्षरपछि एमाले सचिवसमेत रहेका नेता योगेश भट्टराईले संसदीय अभ्यासमा यो सामान्य कुरा भएको बताए ।

‘यो २०४८ सालदेखि नै चलेको चलन हो । सांसदहरूको हस्ताक्षर लिने कुरा नेपालमा मात्रै होइन, संसदीय अभ्यास भएका अन्य देशमा पनि चल्छ’, उनले भने, ‘कहिलेकाहीँ अपर्झट प्रस्ताव दर्ता गर्न हस्ताक्षर लिइन्छ । कोही सांसद विदेश गएका हुन्छन्, कोही काठमाडौं बाहिर हुन्छन् । त्यसैले पार्टीले हस्ताक्षर बटुलेर ठिक्क पार्ने यो संसदीय चलन नै हो ।’

उनले कांग्रेस र एमालेले सल्लाहले हस्ताक्षर अभियान नचलाएको हुन सक्ने पनि बताए । ‘सांसदहरूको हस्ताक्षर महाभियोग र सरकार बदल्न पनि प्रयोग हुन्छ’, उनले भने, ‘तर यिनै दुई काम गर्नका लागि भनेर हस्ताक्षर लिइएको होइन । तर त्यसो हुन पनि सक्छ।’

एमालेका अर्का सांसद गोकुल बास्कोटाले आफू निर्देशन अनुसार सिंहदरबारमा हाजिर भएको बताए । ‘दलको निर्देशन अनुसारको काम गरियो, सूचना के हो थाहा भएन । मलाई केही पनि थाहा भएन’, उनले भने,‘के को लागि होला मलाई चाहिँ खास थाहा छैन । यहाँ मैले केही गरिनँ । दलको कार्यालयमा आउनु भन्ने थियो । प्रमुख सचेतकसँग भेट्नु भन्नु भयो, कुरा गर्‍यौँ, अहिले निस्किएर हिँड्यौँ ।’

उनले आफू काम विशेष भएरै आएको बताउँदै पार्टीको कुनै बैठक भने नरहेको बताए । बास्कोटाले हस्ताक्षर गरे नगरेको केही पनि खुलाउन चाहेनन् ।