काभ्रे– काभ्रेपलाञ्चोकको भुम्लु गाउँपालिका–८ मा पर्ने पौवास्थित भित्री सडकखण्डमा यात्रुबाहक बस दुर्घटनामा परेको छ । दुर्घटनामा २३ जना यात्रु घाइते भएको जिल्ला प्रहरी कार्यालय काभ्रेपलाञ्चोकले जनाएको छ ।

रामेछापको डोरखानीबाट काठमाडौंका लागि छुटेको बा ३ ख ८४०८ नम्बरको बस दिउँसो १२ः२० बजे ब्रेक फेल भई सडकको भित्तामा ठोक्किँदा दुर्घटना भएको हो ।  

बसमा जम्मा ३२ जना यात्रु सवार थिए। तीमध्ये हालसम्म नाम, थर र वतन खुल्न नसकेका २३ जना घाइते यात्रुहरूलाई तत्काल उद्धार गरी उपचारका लागि धुलिखेल अस्पताल पठाइएको प्रहरीले जनाएको छ ।

दुर्घटनाग्रस्त बस घटनास्थलमै रहेको छ । बस चालकलाई दोलालघाट प्रहरी चौकीले नियन्त्रणमा लिएको छ। घटनाको थप विवरण संकलन भइरहेको छ ।