काठमाडौं- अध्यक्ष माधवकुमार नेपाल भ्रष्टाचार मुद्दामा सांसद पदबाट निलम्बित भएको अवस्थामा नेकपा एकीकृत समाजवादीका अर्का नेतालाई पनि संकट आइ परेको छ ।

२०७९ को निर्वाचनमा दाङ क्षेत्र नम्बर १ बाट निर्वाचित नेकपा (एकीकृत समाजवादी) का प्रमुख सचेतक मेटमणि चौधरीलाई ठगीसम्बन्धी मुद्दाको संकट आइलागेको हो ।

समाजवादीका उपमहासचिवसमेत रहेका चौधरीविरुद्ध बैंकिङ कसुरसम्बन्धी आरोपसहित जिल्ला प्रहरी कार्यालय दाङमा जाहेरी परेको छ ।

पूर्वमन्त्रीसमेत रहेका उनीविरुद्ध एभरेष्ट बैंकबाट भुक्तानी गर्ने गरि काटिएको ५ करोड ४० लाख रुपैयाँको चेक अनादरमा मुद्दा प्रक्रिया अघि बढेको जिल्ला प्रहरी कार्यालय दाङले जनाएको छ ।

सांसद चौधरीविरुद्ध हुलाकमार्फत् चेक अनादरसम्बधी जाहेरी आएको जिल्ला प्रहरी कार्यालय दाङका प्रमुख एसपी अर्जुन तिमल्सिनाले बताएका छन् ।

उनीविरुद्ध रोल्पाका एकजना ठेकेदार धात बुढामगरले हुलाकबाट प्रहरीमा जाहेरी दर्ता गराएका हुन् । स्रोतका अनुसार सहरी विकास मन्त्री भएको समयमा उनले ठेक्कासहितको योजना मिलाइदिने भन्दै रकम लिएका थिए ।

तर, उनले भनेअनुसार काम र योजना नमिलेपछि व्यवासयीले रकम फिर्ता माग गरेका थिए । त्यहीक्रममा चौधरीले रकम फिर्ताका लागि काटेको चेक नै साटिएन । उक्त चेकबाट रकम ननिस्केपछि चौधरीविरुद्ध उजुरी परेको हो ।