काठमाडौं– इरानको इस्लामिक रिभल्युसनरी गार्ड कोर (आईआरजीसी) ले इजरायलको रक्षा प्रणाली निस्तेज पारेको जनाएको छ । इजरायली आक्रमणको जवाफस्वरुप इरानले सञ्चालन गरेको अपरेशन ट्रु प्रोमिस तीनको १२ औँ चरणको आक्रमणपछि विज्ञप्ति निकाल्दै आईआरजीसीले यस्तो बताएको हो ।

आईआरजीसीले जारी गरेको विज्ञप्तिमा रक्षा प्रणाली ध्वस्त भएसँगै अधिनस्थ प्यालेस्टाइनी भूमिमा बसोबास गर्ने बासिन्दासँग सेल्टरमा विस्तारै मृत्युवरण गर्ने या ती भूभाग छाडेर जाने दुई विकल्प रहेको जनाइएको छ । रक्षा प्रणाली ध्वस्त भएसँगै अब ‘अधिनस्थ भूभागको हवाइ क्षेत्रले इरानी क्षेप्यास्त्र र चालहरहित हवाइ उपकरण ड्रोनलाई अङ्कमाल गर्ने’ विज्ञप्तिमा जनाइएको छ ।

इरानको महर समाचार संस्थाले जनाएअनुसार आईआरजीसीले प्यालेस्टाइनको अधिनस्थ भूमिमा क्षेप्यास्त्र आक्रमणलाई निरन्तरता दिने पनि उल्लेख गरेको छ । आईआरजीसीले इजरायलमा सतर्क गराउने साइरन ‘एक सेकेण्ड पनि नरोकिने’ चेतावनी दिएको महरले जनाएको छ ।