काठमाडौं– नायक पल शाह केन्द्रीय भूमिकामा रहने भनिएको फिल्म ‘महाराजधिराज’को अहिले कलाकार चयनको काम धमाधम भइरहेको छ ।

दशैँमा प्रदर्शन मिति तोकिएको यो फिल्मको जेठको पहिलो सातामा पनि कलाकार चयनमै छ ।

तर, एकपछि अर्को स्टारको प्रवेशले कलाकारको लाइनअप रोचक देखिएको छ । यो फिल्ममा पलसहित नायक आर्यन सिग्लदेल, नायिका वर्षा सिवाकोटी र कलाकार जयकिशन बस्नेत फाइनल भइसकेका छन् । नायक रमेश उप्रेतीले आठ वर्षपछि यो फिल्मबाट कमब्याक गर्दैछन् ।

निर्माण पक्षले सोमबार नायिकामा वर्षा राउतको प्रवेश भएको जानकारी दिएको छ । संयोग– यो फिल्ममा अनुबन्ध भएकी दुवै नायिकाको नाम वर्षा हो ।

निर्देशक परिच्छेद सेनको नै यो फिल्ममा लेखन रहेको बताइएको छ । छत्रेश्वर म्यानेजमेन्ट प्रालिको ब्यानरमा निर्माण हुने यस फिल्मको प्रस्तुतकर्ता विराज बिष्ट हुन् । टोपेन्द्र विष्ट, चक्रबहादुर केसी र रवि खड्का निर्माता हुन् ।