काठमाडौं- अफ्रिकी मुलुक नाइजेरियामा गाइवस्तु पालेर गुजारा गर्ने गोठाला र खेती गरेर गुजारा गर्ने किसान समुदायबीचको द्वन्द्व चर्किँदै गएको छ । हालै नाइजेरियाको बेनुइ राज्यमा दुई समुदायबीच झडप हुँदा १७ जना मारिएका छन् ।

समाचार संस्था रोयटर्सका अनुसार बेनुइमा गोठालो समुदायले किसान समुदायलाई निशाना बनाएर आक्रमण गर्दा हताहती भएको हो । घटनामा अरु कैयाँै घाइते भएका छन् ।

सुरुमा गोठाला समुदायमा आबद्ध बन्दुकधारीको समूहले बेनुइको उकुम क्षेत्रस्थित ग्बागिर गाउँमा गोली हानी ५ किसानको हत्या गरेका थिए । पछि बन्दुकधारीको अर्को समूहले ७० किलोमिटर टाढा रहेको लोगो क्षेत्रमा आक्रमण गरी १२ जनाको ज्यान लिएका थिए ।

पछिल्ला केही वर्षयता उर्वर भूमि रहेको उत्तर–मध्य नाइजेरियामा हुँदै आएका हिंसाका कारण खाद्य आपूर्तिमा बाधा उत्पन्न भएको छ । दुई दिनअघि मात्रै बेनुइ राज्यको ओतुक्पो क्षेत्रमा बन्दुकधारीले गाउँमा आक्रमण गर्दा ११ जनाले ज्यान गुमाएका थिए । त्यसअघि गत साता छिमेकी प्लेटु राज्यमा भएको अर्को आक्रमणमा ५० जनाको मुत्यु भएको थियो ।

खासगरी गोठाला समुदायले आफ्ना गाइवस्तुको चरन क्षेत्रमा किसान समुदायले खेती गर्न थालेको आरोप लगाउने गरेका छन् । त्यसैगरी, किसान समुदायले पनि आफूले खेती गर्ने जमिनमा गोठालाहरुले गाइवस्तु चराउने गरेको आरोप लगाउँदै आएका छन् ।

सन् २०१९ यता दुई समुदायबीच जारी द्वन्द्वका कारण हालसम्म ५ सय जनाभन्दा धेरैले ज्यान गुमाएका छन् । हिंसाका कारण अरु २२ लाख मानिसहरु विस्थापित भएका छन् ।