काठमाडौं- प्रमुख प्रतिपक्षी नेकपा (माओवादी केन्द्र) का उपमहासचिव जनार्दन शर्माले २०५८ जेठ १९ गते राति तत्कालीन राजा वीरेन्द्र शाहको वंशनाससँगै अन्त्य भएको राजतन्त्र फेरि नफर्किने बताएका छन् ।

बुधबार दिउँसो प्रतिनिधि सभाको बैठकलाई सम्बोधन गर्दै उपमहासचिव शर्माले सार्वभौम भइसकेका जनताले फेरि राजतन्त्र ल्याउने मुर्खता नगर्ने पनि जिकिर गरेका छन् ।

उपमहासचिव शर्माले बरू नेता र नेतृत्वमा रहेको राजतन्त्रात्मक सोच, शैली, प्रवृत्ति र व्यवहारलाई अन्त्य गर्नुपर्ने पनि बताएका छन् । उनले यस कामलाई सबै दलले कार्यान्वयन गर्नु आवश्यक रहेको जिकिर गरे ।

‘वंशनाससँगै समाप्त भएको राजतन्त्र फेरि फर्किँदैन । सार्वभौम भएका जनताले राजतन्त्र ल्याउने मुर्खता पनि गर्दैनन् भन्ने कुरा स्पष्ट गर्न चहान्छु’, उनले भने, ‘बरू समाजमा बाँकी रहेको राजतन्त्रात्मक सोच, शैली, प्रवृत्ति र व्यवहारलाई अन्त्य गर्नैपर्छ । हामी आफैँभित्रको राजतन्त्रलाई अन्त्य गर्नु लाग्नुपर्छ । आजको मुख्य काम यही हो ।’

आफूलाई राजतन्त्र फर्किन्छ भन्ने डर नरहेको बताउँदै तर नेता र नेतृत्व सुध्रिनुपर्ने उल्लेख गरे । ‘मलाई राजतन्त्र आउँछ भन्ने डर छैन । अब केवल नेता र नेतृत्वहरूले आ-आफ्ना कमजोरी स्वीकार गरेर सँच्चिन सक्छन् कि सक्दैनन् भन्नेमात्रै डर छ ।’