काठमाडौं- हाँडीगाउँका विभिन्न रुटमा काठमाडौं महानगरपालिकाले बुधबारदेखि एकतर्फी सवारीसाधन प्रणाली लागु गरेको छ । महानगरको बैठकले यसअघि नै बुधबारदेखि हाँडीगाउँमा एकतर्फी नियम लगाउने निर्णय गरेको थियो ।

सुरूका दिनमा चालकहरू रूटबारे अलमलिने भएकाले नगर प्रहरी परिचालन गरी ट्राफिक डाइभर्टको काम भइरहेको छ ।

काठमाडौँ महानगरपालिका-५ अन्तर्गत थटु मार्गबाट वडा कार्यालय भीमसेन मार्ग, हात्ती महांकाल मार्ग-हाडीगाउँ मार्गतर्फ मात्र प्रवेश गर्न पाइने छ ।

विशालनगरतर्फबाट आउने सवारी साधनलाई भीमसेन मार्ग हुँदै वडा नं. ५ कार्यालयतर्फ जान प्रवेश निषेध गरी हात्ती महांकाल तर्फमात्रै प्रवेश गर्न दिइने छ ।

हाँडीगाउँ हुँदै ढुंगेधारातर्फ सोझो प्रवेश निषेध गरी सवारी साधनहरूलाई थटु मार्गतर्फबाट जान मिल्ने बनाइएको छ ।

नक्साल भाटभटेनीतर्फबाट आउने सवारी साधन वडा नं. ५ को कार्यालयबाट थटु मार्गतर्फ प्रवेश निषेध गरी भीमसेन मार्गतर्फ मात्रै जान पाउने गरी ठाउँ-ठाउँमा ‘वान वे’को बोर्ड राखिएको छ ।

ढुंगेधाराबाट हात्ती महांकालतर्फ पनि प्रवेश निषेध गरिएको छ । वडा नं. ५ कार्यालयको दक्षिणतर्फबाट गहना पोखरीतर्फ प्रवेश निषेध बनाइएको छ ।

बालमन्दिरतर्फबाट टंगाल जाने कैलाश मार्गमा बालमन्दिरतर्फबाट मात्रै प्रवेश गर्न पाउने र टंगालबाट प्रवेश निषेध गरिएको छ ।

तस्बिरहरू : नेपाल फोटो लाइब्रेरी