काठमाडौं– नेकपा एकीकृत समाजवादीले अध्यादेशको प्रक्रिया र अन्तर्वस्तु असहमति जनाएको छ ।

पार्टी कार्यालय आलोकनगरमा बुधबार बसेको नेकपा एकीकृत समाजवादीको पोलिटब्यूरो बैठकले भूमाफिया, कालोबजारीया, राजस्व छली गर्ने व्यक्ति, बिचौलिया, भ्रष्टाचारी, तस्कर र दलालहरूलाई फाइदा पुग्नेगरि अध्यादेशको ल्याएको भन्दै असहमति र विरोध जनाएको हो । 

बैठकले संसद्मा अध्यादेशहरूको विपक्षमा मतदान गर्ने स्थायी कमिटीको निर्णयलाई अनुमोदन गरेको प्रचार विभाग प्रमुख प्रकाश ज्वालाले जानकारी दिए । 

बैठकले भारतको ओडिसास्थीत एक क्याम्पसमा नेपाली विद्यार्थीमाथि भएको घटनाप्रति सत्य तथ्य छानबिन गरी दोषीलाई कारबाही गर्नका लागि कूटनीतिक पहल गर्न माग गरेको छ भने खोटाङको हलेसीमा केही दिनअघि भएको आगलागीका पीडित पक्षहरूलाई आवश्यक क्षतिपूर्तिको लागि सरकारको ध्यानाकर्षण गराएको ज्वालाले बताए । 

बैठकमा विधान प्रकाशनका सम्बन्धमा सम्मानित नेता झलनाथ खनालले असन्तुष्ट व्यक्त गरेका थिए । महाधिवेशनले निर्णय गरेका कुराहरू फरक ढंगले विधानमा समावेश भएकाले त्यसलाई सच्चाउने निर्णय भएको ज्वालाले जानकारी दिए । 

त्यस्तै बैठकले बिहीबारबाट सुरु हुने पार्टीको केन्द्रीय कमिटी बैठकको एजेन्डा पारित गरेको छ । 

अध्यक्षको राजनीतिक प्रतिवेदन, पार्टी नियमावली, विनियम, निर्देशिका, आचारसंहिता, आन्दोलनद्वारा पार्टी निर्माण सम्बन्धी आगामी कार्य योजना लगायतका केन्द्रीय कमिटी बैठकका एजेन्डाहरू पारित गरेको प्रचार विभाग प्रमुख ज्वालाले बताए ।