काठमाडौं– नेकपा एमालेका अध्यक्ष केपी शर्मा ओलीले मुलुकको चुनौतीलाई सामना गर्न पार्टीलाई बलियो ढंगले अघि बढाउने बताएका छन् । 

एघारौं महाधिवेशन समापन समारोहलाई बिहीबार साँझ सम्बोधन गर्दै अध्यक्ष ओलीले यस्तो बताएका हुन् । उनले अहिले एमाले नेतृत्वमाथि चौतर्फी हमला गर्न खोजेको भन्दै उनले नेतृत्वलाई छोए देश ठप्प पार्ने चेतावनी दिए । 

अध्यक्ष ओलीले वर्तमान अन्तरिम सरकार चुनाव गराउने म्याण्डेडबाट बाहिर गएको आरोप लगाए।  उनले सर्वोच्च अदालतले राष्ट्रको जटिलतालाई मध्यनजर गर्दै संवैधानिक व्यवस्थामा देशलाई फर्काउन संसद् पुर्नस्थापना गर्ने विश्वास व्यक्त गरे । 

उनले निर्वाचन प्रचारप्रसारका लागि बनाइएको आचारसंहिताप्रति पनि आपत्ति जनाए । अध्यक्ष ओलीले जाँचबुझ आयोगको कामप्रति पनि असन्तुष्टि जनाउँदै अर्को आयोग बनाउन माग गरे । 

एमालेले चर्चामा रहेका सबै भ्रष्टाचार प्रकरणको अनुसन्धान सुरु गर्न गर्न आह्वान गर्ने लगायतका २४ बुँदे प्रस्ताव पारित गरेको छ । यसैबीच एमालेले शुक्रबार दिउँसो १ बजे पार्टीको नवनिर्वाचित केन्द्रीय कमिटीको पहिलो बैठक आह्वान गरेको छ । 

नयाँ नेतृत्व चयन र समसामयिक राजनीतिक प्रस्ताव पारित गर्दै नेकपा (एमाले) को ११औँ राष्ट्रिय महाधिवेशन सम्पन्न भएको छ ।

मङ्सिर २७ गतेबाट सुरु भएको एमाले महाधिवेशन बिहीबार औपचारिक रुपमा सम्पन्न भएको हो । भृकुटीमण्डपमा महाधिवेशन सम्पन्न हुनुअघि पार्टीको केन्द्रीय निर्वाचन आयोगका अध्यक्ष डा. विजय सुब्बाले अन्तिम मत परिणाम घोषणा गरे। 

अन्तिम मत परिणाममा केपी शर्मा ओलीको नेतृत्वमा ३०१ सदस्यीय केन्द्रीय कमिटी र २५-२५ सदस्यीय केन्द्रीय अनुशासन आयोग र लेखा आयोगका पदाधिकारी र सदस्यहरू निर्वाचित भएका छन् ।