काठमाडौँ– दक्षिण भारतीय सुपरस्टार प्रभासको आगामी फिल्म ‘द राजा साब’को दोस्रो गीत ‘सहाना सहाना’ सार्वजनिक गरिएको छ। यो गीतले दर्शकलाई फिल्मको रोमान्टिक पक्षसँग नजिकबाट परिचित गराएको छ।।

टी–सिरिजको युट्युब च्यानलमार्फत सार्वजनिक गरिएको गीतको भिडियोमा प्रभास र अभिनेत्री निधि अग्रवालबीचको रोमान्टिक केमेस्ट्री देख्न सकिन्छ। आकर्षक लोकेसन र सौम्य प्रस्तुतिले गीतलाई अझ प्रभावशाली बनाएको छ।

गीतमा चर्चित संगीतकार थमन एसको संगीत रहेको छ भने शब्द कृष्णा कान्थले लेखेका हुन्। ‘सहाना सहाना’मा विशाल मिश्रा, थमन एस र श्रुति रञ्जनीको स्वर समावेश छ। यो गीत विभिन्न भाषामा सार्वजनिक गरिएको छ।

मारूतीद्वारा लिखित तथा निर्देशित ‘द राजा साब’ तेलुगु भाषाको रोमान्टिक–हरर कमेडी फिल्म हो। फिल्ममा प्रभास र निधि अग्रवालसँगै सञ्जय दत्त, बोमन इरानी, मालविका मोहनन, रिद्धि कुमार र जरिना वहाबलगायत कलाकारको अभिनय रहेको छ।

निर्माण पक्षका अनुसार ‘द राजा साब’ आगामी ९ जनवरी २०२६ मा विश्वव्यापी रूपमा प्रदर्शनमा आउने तयारीमा छ।