एजेन्सी– इजरायली सेनाले सैन्य परिसरसहित हेजबुल्लाहको पूर्वाधारलाई लक्षित गरी लेबनानमा आक्रमण गरेको लेबनानको सरकारी मिडियाले जनाएको छ ।

 सन् २०२४ नोभेम्बरको युद्धविरामको बावजुद इजरायल र लडाकु समूह हेजबुल्लाह बीचको एक वर्ष भन्दा बढीको शत्रुता अन्त्य हुने अपेक्षा गरिएको थियो,यद्दपी इजरायलले लेबनानमा आक्रमण जारी राखी पाँच वटा दक्षिणी क्षेत्रहरूमा सेना राखेको छ ।

लेबनानको सरकारी राष्ट्रिय समाचार एजेन्सीले दक्षिण र पूर्वका पहाडी क्षेत्रहरूमा थुप्रै आक्रमणहरू भएको रिपोर्ट गरेको छ । इजरायली सेनाले इरान समर्थित समूहका सदस्यहरूका लागि हेजबुल्लाहले प्रशिक्षण र पाठ्यक्रम सञ्चालन गर्न प्रयोग गरेको सैन्य परिसरसहित लेबनानका धेरै क्षेत्रहरूमा आतंककारी पूर्वाधार स्थलहरूलाई लक्षित गरेको बताएको छ ।

इजरायली सेनाले केही समय अघि, आईडीएफले दक्षिणी लेबनानको ताइबेह क्षेत्रमा हेजबुल्लाह आतङ्ककारीलाई आक्रमण गरेको थियो । आगामी शुक्रबार संयुक्त राज्य अमेरिका र फ्रान्सलगायतको सहभागीतामा युद्धविराम अनुगमन समितिको बैठक तय भएको छ ।

मंगलबार बेरुतबाट ३० किलोमिटर दक्षिणमा इजरायली आक्रमणमा दुई जनाको मृत्यु भएको थियो । लेबनानमा युद्धविराम सम्झौता लागू भए देखि इजरायली आक्रमणबाट करिब ३४० जनाको मृत्यु भएको स्वास्थ्य मन्त्रालयलाई उदृत गर्दै एएफपीले जनाएको छ ।