काठमाडौं– चालु आर्थिक वर्ष (आव) को कात्तिक महिनामा असोज महिनाको तुलनामा घरजग्गा कारोबारको लिखत पारित बढेको छ । भूमि व्यवस्थापन विभागको तथ्यांकअनुसार असोज महिनाको तुलनामा ५ हजार बढी संख्याले घरजग्गाको लिखत पारित संख्यामा वृद्धि भएको हो ।

विभागका अनुसार कात्तिक महिनामा २८ हजार ३८३ वटा लिखत पारित भएको छ । जबकि चालु आवको साउन महिनामा ३१ हजार ६२१, भदौ महिनामा २७ हजार ४९४ र असोज महिनामा २३ हजार ३५३ वटा लिखत पारित भएको थियो ।

कात्तिक महिनामा घरजग्गाको लिखत पारित संख्या सन्तोषजनक भए पनि पुँजीगत लाभकर र राजस्व आम्दानी भने चालु आवकै कमजोर हुन पुगेको छ । 

विभागका अनुसार सरकारले घरजग्गा कारोबारमार्फत कात्तिक महिनामा पुँजीगत लाभकर ९९ करोड ७८ लाख ४४ हजार ३९२ रुपैयाँ पुँजीगत लाभकर आम्दानी गरेको छ भने २ अर्ब ७४ करोड ५१ लाख ७२ हजार १ सय ९९ रुपैयाँ जम्मा राजस्व आम्दानी गरेको छ ।

सरकारले चालु आवमा घरजग्गा कारोबारबाट पुँजीगत लाभकरमार्फत साउन महिनामा १ अर्ब १९ करोड ११ लाख ९९ हजार ७३८ रुपैयाँ, भदौ महिनामा १ अर्ब २० करोड ९२ लाख २९ हजार ९५५ र असोज महिनामा १ अर्ब ६ करोड १९ लाख ३५ हजार ५ सय ३७ रुपैयाँ आम्दानी गरेको थियो ।

त्यस्तै, सरकारले चालु आवमा घरजग्गा कारोबारमार्फत साउन महिनामा ३ अर्ब २८ करोड ९१ लाख ३८ हजार २४२ रुपैयाँ, भदौ महिनामा ३ अर्ब १४ करोड ७ लाख १६ हजार ३५५ र असोज महिनामा २ अर्ब ७५ करोड ८५ लाख ५७ हजार ९२७ रुपैयाँ कुल राजस्व आम्दानी गरेको थियो ।