काठमाडौं- अशोक राई नेतृत्वको जनता समाजवादी पार्टीमा विवाद देखिएको छ। जारी कार्यकारिणी बैठकमा नेताहरू नेपाली कम्युनिस्ट पार्टी र मधेशवादीसँग मिल्ने विषयमा बाझिएका हुन् ।

सोमबारबाट सुरू भएको बैठक मङ्गलबार पनि जारी रहने नेता प्रदीप यादवले बताए । यादवका अनुसार बैठकमा कार्यकारणी सदस्यहरूले सम्भावित रणनीतिबारे आफ्नो धारणा राखिरहेका छन्।

धारणा राख्ने क्रममा सोमबारको बैठकमा ५० प्रतिशत कार्यकारणी सदस्यले पुष्पकमल दाहाल प्रचण्ड संयोजक रहेको नेपाली कम्युनिस्ट पार्टीसँग एकता गर्नुपर्ने मत राखे ।

यस्तै अन्य सदस्यहरूले मधेसवादी दलहरूसँग एकता गर्नुपर्ने पक्षमा आफ्नो मत राखेका छन् ।

‘सोमबारको बैठकमा ५० प्रतिशत सदस्यले नेकपासँग एकता गर्नुपर्ने मत राख्नुभएको छ । अन्य ५० प्रतिशत केन्द्रीय सदस्यले मधेसी दलहरूसँग एकता गएर अथवा मोर्चाबन्दी गरेर अगाडि बढ्नुपर्ने कुरा राख्नुभएको छ’, यादवले खबरहबसँग भने,‘पार्टीमा विवाद छैन, कसैले नेकपासँग एकता गर्नुपर्ने त कसैले मधेसीसँग मोर्चा अथवा कार्यगत एकता गर्नुपर्ने भन्नुभएको छ। सबैको विचार सुनेर अध्यक्षज्यूले निर्णय गर्नुपर्छ भन्नुभएको छ ।’

यादव पार्टी एकताका विषयमा लिएर सामान्य छलफल भए पनि विवाद भएर पार्टी विभाजन हुने अवस्था नआउने कुरामा ढुक्क छन्।

गतवर्ष उपेन्द्र यादव नेतृत्वको जनता समाजवादी पार्टी नेपालबाट छुटेर अशोक राईले जसपा बनाएका थिए । त्यसबेला उनी केपी शर्मा ओली नेतृत्वको सरकारमा सहभागी भए ।

राईको पार्टीमा पनि ठूलो पंक्तिमा मधेसी दलका नेताहरू छन्। राईनिकटहरू नेकपासँग एकता गर्नुपर्ने पक्षमा छन् ।

तर प्रदीप यादवसहित, नवलकिशोर साह लगायतका नेताहरू मधेसवादी दलहरूसँग कार्यगत एकता अथवा पार्टी एकता गर्नुपर्ने पक्षमा छन्। जसपाले यसको टुंगो मंगलबार बेलुकासम्म लगाउने भएको छ।