काठमाडौं – यो दशैँमा चार फिल्महरु ‘माइतीघर’, ‘हरिबहादुरको जुत्ता’, ‘बलिदान’ र ‘अभिमन्यु’ एक साथ प्रदर्शनमा आउँदा गायक तथा नायक प्रकाश सपुतलाई संकट सिर्जना भएको छ ।

चारवटाले बक्स अफिस प्रतिस्पर्धामा गर्ने हुँदा ती फिल्मका कलाकारहरुलाई सामान्य अवस्थाभन्दा अलि बढी प्रचारमा जुट्नुपर्ने दबाब स्वभाविक छ ।

त्यहीमाथि प्रकाशकफ फिल्म जुधेँको छ । उनी फिल्महरु ‘माइतीघर’ र ‘हरिबहादुरको जुत्ता’को नायक हुन्।

प्रकाश चलेको प्रोफाइल भएकाले प्रचारमा प्रयोग हुने अनुहार हुन् । अर्थात्, दुवै फिल्मको निर्माण पक्षले उनलाई प्रचारमा प्रयोग गर्ने निश्चित छ । यो उनको व्यवसायिक बाध्यता पनि हो ।

प्रदर्शन मिति असोज १३ गते आउन अब दुई साताभन्दा कम समय छ । यो बाँकी दिनमा उनले दुई फिल्मको प्रचारमा निस्कनुपर्ने हुन्छ ।

प्रकाशलाई आइलागेको मुख्य संकट, ‘एकै मितिमा प्रदर्शनमा आएका दुई फिल्म हरिदिनू’ भनेर दर्शकलाई आग्रह गर्न हो ।

बानेश्वरस्थित एक हलमा बिहीबार ‘माइतीघर’को ट्रेलर सार्वजनिक कार्यक्रम राखिएको थियो । जसमा प्रकाश सपुत उपस्थित हुने भइहाले ।

उनलाई यही संकटबारे प्रश्न सोधिएको थियो । ‘तपाईंको प्राथमिकतामा कुन फिल्म छ ?’ भन्ने प्रश्नमा प्रकाशले हाँस्दै सांकेतिकरुपमा आफू नैतिक संकटमा परेको जवाफ फर्काए ।

उनले भने, ‘मेरो लागि यी दुई फिल्म छोरा र छोरी जस्तै हो । अब कुन चाहिँ प्राथमिकतामा राख्नु ?’

‘अनि कुन फिल्म छोरा, कुन फिल्म छोरी ?’ भनेर उनलाई अर्को प्रश्न गरिएको थियो । उनको जवाफ थियो– हरिबहादुरको जुत्ता’ छोरा । माइतीघर’ छोरी ।

अब प्रकाशले दुई फिल्मको प्रचार कसरी गर्लान् ? त्यो हेर्न बाँकी छ ।

बिहीबार पनि प्रकाशका लागि अर्को संयोगको दिन हो । किनकि यो दिन प्रकाशको अभिनय रहेको अर्को फिल्म ‘सोल्टिनी’को टिजर सार्वजनिक भएको थियो । एकै दिन एक कलाकारको दुई फिल्मको टिजर र ट्रेलर सार्वजनिक हुनु विरलै हुने घटना हो ।

यसरी एकै कलाकारको एक साथ दुई फिल्म प्रदर्शनमा आउने भयङ्कर दुर्लभ घटना होइन । विगतमा यस्तो उदाहरण धेरै छन् । ‍

तर, प्रकाशको करिअरमा भने यो पहिलो पटक हो । एक साथ चार फिल्म प्रदर्शनमा आउने अवस्थामा झन् एकै कलाकारको दुईवटा आउन लागेको यो पहिलो पटक हो ।