काठमाडौं – हाँस्य टेलिभिजन सिरियल ‘भद्रगोल’ र ‘सक्किगोनि’बाट चर्चामा आएका दीपक आचार्य ‘काकु’को डेब्यू निर्देशनमा बनेको फिल्म ‘परान’ कात्तिक १४ मा प्रदर्शनमा आउने भएको छ ।

निर्माण पक्षले बिहीबार फिल्मको फ्रर्स्टलुक पोस्टर सार्वजनिक गरी प्रदर्शन मितिबारे जानकारी दिएको हो ।

सार्वजनिक पोस्टरमा नायक महेश त्रिपाठी र नायिका अञ्जना बराइलीलाई फिचर्ड गरिएको छ । पोस्टरमा अञ्जना महेशको अँगालोमा छिन् । उनी प्रेमभावमा प्रस्तुत छिन् । महेश भने पोस्टरमा गम्भीर देखिन्छन् ।

पोस्टरले यी दुई फिल्ममा विवाहित जोडीको भूमिकामा रहेको संकेत गर्छ । किनभने अञ्जनाको सिउँदोमा सिन्दुर र गलामा पोते देख्न सकिन्छ ।

नायक नायिकाको पहिरनले यो फिल्म मध्यम वर्गीय परिवारको कथामा रहेको अनुमान लगाउन सकिन्छ ।

यस फिल्मको ट्याग लाइन ‘सासले होइन, साथले चल्ने’ राखिएको छ । यसले फिल्मको मुख्य सार प्रस्तुत गर्ने निर्माण पक्षले बताएको छ । यसले पनि फिल्म सम्बन्धको कथामा बनेको हुनसक्ने सहज अनुमान गर्न सकिन्छ ।

यस फिल्ममा नीर शाह, पूजा चन्द, केकी अधिकारी, प्रवीण खतिवडा पनि शीर्ष भूमिकामा रहेको बताइएको छ ।

यो फिल्मको कथा निर्देशक आचार्यकै हो । पटकथा तथा संवाद भने यम थापाले लेखेका हुन् ।

फ्रर्स्ट लुक पोस्टर सार्वजनिक गरेसँगै फिल्मको प्रचारको काम सुरु भएको निर्देशक आचार्यले बताएका छन् ।