काठमाडौं– भदौ २३ र २४ गते जेन-जी पुस्ताका युवाहरूले सरकार परिवर्तन गर्नेगरी गरेको आन्दोलनको नराम्रो प्रभाव बिहीबार पुँजीबजारमा देखियो । बिहीबार नेपाल स्टक एक्सचेञ्ज (नेप्से) मा सेयर कारोबार हुँदा नेप्से समयसीमा अनुसार ४, ५ र ६ प्रतिशतले घटेर बन्द भयो ।

२२६ वटा कम्पनीको मात्रै सेयर कारोबार हुँदा १६०.३३ अंकले घटेर नेप्से २५११.३३ अंकमा झरेको छ । बिहीबार कारोबार भएका कम्पनीमध्ये २१७ वटा कम्पनीको सेयर मूल्य घट्यो भने ९ वटा कम्पनीको सेयर मूल्य मात्रै बढ्यो ।

बिहीबार अन्तिम सर्किट लागेर बजार बन्द हुनेबेलासम्म ७२ करोड ८७ लाख दुई हजार ८३० रुपैयाँ बराबरको मात्रै कारोबार भएको थियो ।

आजको कारोबारमा व्यापार समूहमा सबैभन्दा धेरै ९.४३ प्रतिशत अर्थात् ३६४.६४ अंकले पहिरो गएको छ ।

यी हुन् आजका भाग्यमानी कम्पनी

तीनपटक सर्किट लागेर नेप्से बन्द भएपनि नौ वटा कम्पनीको सेयर मूल्य भने बिहीबार बढ्यो । जसमध्ये हिमस्टार उर्जा कम्पनी लिमिटेडको सेयर मूल्य सबैभन्दा धेरै ४३ अंकले बढ्यो ।

त्यस्तै, बिहीबार एसियन हाइड्रोपावर, अभियान लघुवित्त, गणपति लघुवित्त, खानीखोला हाइड्रोपावर लक्ष्मी लघुवित्त, नेशनल लघुवित्त, रावा इनर्जी र सामुदायिक लघुवित्त कम्पनीको सेयर मूल्य बढेको छ ।