काठमाडौँ- राप्रपा नेपालका अध्यक्ष कमल थापाले मुलुकमा देखापरेको वर्तमान संकटको जड संघीयता, धर्मनिरपेक्ष, गणतन्त्रसँगै कांग्रेस–कम्युनिस्ट दलहरूको अकर्मण्यता, सत्तालिप्सा र भ्रष्टाचार भएको दाबी गरेका छन्।

सामाजिक सञ्जालमार्फत विचार व्यक्त गर्दै थापाले भने, ‘कतिपयलाई तितो लाग्न सक्दछ, तर सत्य बोल्न छाड्नु हुँदैन। नेपालमा हाल देखापरेको संकटको मुख्य कारण यही असफल संरचना र प्रवृत्ति हो।’

उनले भदौ २३ र २४ गतेको ‘जेन-जी आन्दोलन’ले नयाँ पुस्ताका लागि नवनिर्माणको ढोका खोलेको उल्लेख गरेका छन् ।

यदि पुनः त्यही असफल विचार र कांग्रेस–कम्युनिस्ट प्रवृत्तिका अनुयायीहरू नै हावी भए नयाँ पुस्ताले गरेको बलिदान निरर्थक हुने चेतावनी उनले दिएका छन्।

थापाले विशेषगरी युवापुस्तालाई सचेत रहन आग्रह गर्दै मुलुकलाई वैकल्पिक बाटो रोज्न आह्वान गरेका छन्।